Amabhokisa azolwa kuqaqamba izinhliziyo
Asanda kushonelwa ngamalungu amqoka emindeni yawo
BAZOHLANGANA eringini beqaqanjelwa yizinhliziyo uNkululeko “Bulldog” Mhlongo noWalter “Black Mamba” Dlamini empini ebhekwe ngabomvu ezokuba se-Inkosi Albert Luthuli International Convention Centre (ICC), eThekwini ngomhla ka-20 kwephezulu.
UMhlongo uzobe evikela isicoco seWorld Boxing Association (WBA) Pan African middleweight okokuqala. Lesi sicoco uMhlongo wasiphuca yena uDlamini empini yangonyaka odlule ePretoria. Kuleya mpi uDlamini wahlwithwa nebhande likazwelonke.
La mabhokisa azohlangana kule mpi yamagqubu nje, ehlelwe wumshophi wokushonelwa ngabantu abasondelene nawo. UDlamini ongowaseSoweto, ushonelwe ngumqeqeshi wakhe weminyaka uLeon Hunter, onqotshwe wukugula obesekugudle naye isikhathi eside. UMhlongo yena uhanjelwe emhlabeni yindodana yakhe athi ibulawe wukudla obekufakwe ushevu ngenyanga edlule.
Womabili la mabhokisa athembise ukulwa aze anqamuke izandla ukuze anqobele laba bantu abebesezinhliziyweni zabo ngokwahlukana. UMhlongo uzobe eqala ukulwa ngakubo KwaZulu-Natal njengoba izimpi zakhe eziningi ezilwa eGoli, eFree State naphesheya kwezilwandle.
Leli bhokisa elidabuka eZiqwaqweni eShowe, selizakhele igama ngokulwa ngesandla esisodwa esinye lisibelethe emhlane. Lesi sitayela usenza uma esebona ukuthi isitha sakhe sesiphelelwe wushatini futhi useshosholoza phambili ngamaphuzu. Le mpi kaMhlongo noDlamini izobhulela amazolo enkulu ye-International Boxing Federation (IBF) flyweight phakathi kukaMoruti “Babyface” Mthalane noJason Mama wasePhillipines.
Omunye umshayisibhakela ozobonakala kulo mqhudelwano omkhulu ngu-Innocent “Tycoon” Mantengu waseMtubatuba noSabelo Ngebiyane waseWestern Cape empini engenasicoco. UMantengu uzobe ekhuza ibuya eringini ngemuva kokwephucwa ibhande likazwelonke lesisindo se- junior featherweight ngamaphuzu ngu-Ayabonga “Jay Jay” Sonjica e-Orient Theatre, eMonti, ngonyaka odlule.
Lezi zimpi zase-ICC zihlelwe nguNokwanda Mbatha weTono Promotions osengene emlandweni ngokuba nguphromotha wokuqala wesifazane e-Afrika jikelele ukuqhatha impi yomhlaba.