KUPHAZAMISEKE UKUFUNDA BEBHIKISHELA UKUSWELA AMANZI
KUPHAZAMISEKE ukufunda ezikoleni ezintathu zaseMadundubala eMfume, ngaphansi kukaMasipala weTheku, ngoMsombuluko ngenxa yezakhamizi ebezikhala ngendlala yamanzi okubikwa ukuthi isigadle iminyaka engaphezulu kwemibili kule ndawo, kodwa ezigodini ezingomakhelwane akhona.
Phakathi kwezikole eziphazamisekile, yiSingele High School neMadundubala Primary School.
Amanye amalungu omphakathi atshele ILANGA ukuthi kuba nzima ngisho ukuvumela abantwana ukuba baye esikoleni ngoba nakhona bafike babhekane nenkinga efanayo yokungabikhona kwamanzi.
Umphakathi ukhethe ukuvala izikole ezakhele le ndawo ngoMsombuluko emuva kokuquleka kwabafundi emasontweni adlule njengoba kuke kwahlasela isivuvu sokushisa KwaZulu-Natal.
Amalungu omphakathi athi uma efuna amanzi, aphuma agcwale izinkalo kuhle kwamaphisi eyozingela.
“Sisivalile isikole ngoMsombuluko ngoba sikhathazekile ngezingane zethu. Akhona amathangi esikoleni, kodwa kubangcono uma like lana. Manje-ke inkinga wukuthi nawo lawo manzi agcina enoshobishobi, okungelula ukuba izingane ziwaphuze. Kuphoqa ukuba
ziphume ziyowafuna emihosheni, nayo enamanzi angcolile. Izingane zigcina ziphihlika izilonda ngenxa yala manzi,” kuso uMnu Bongani Gumede ongesinye sezakhamizi
zakule ndawo.
Uthe izingane zesikole zihambe zayofuna amanzi komunye umhosha ngeledlule, zabuya sezibaleka ngoba kuthiwa sekubonakale inyoka.
“Sikhathazeke kakhulu ngoba kwathina sinenkinga enkulu yokungabinawo amanzi. Okusixaka kakhulu wukuthi akhona amapayipi, kodwa amanzi kawaphumi.
“Satshelwa eminyakeni eyedlule ukuthi kube nenkinga ye-valve, kodwa kuyaxaka ukuthi yonke le minyaka kayilungiseki yini,” kusho yena.
UMnu Zwelethu Gumede - naye oyisakhamuzi sakule ndawo - uthe njengoba izingane zigcwala imihosha ziyokha amanzi ngesikhathi sesikole, ziba nenkinga efanayo uma sezisemakhaya ngoba kusuke kusafuneka zigcwale izinkalo zifunana namanzi.
“Lezi zingane kazikwazi nokwenza kahle umsebenzi wazo wesikole ngoba zibuya ziphume ziyokha amanzi. Kwesinye isikhathi zize zibuye sekuhwalele. Ngike ngize ngiqashe imoto ngithuthe ngayo amanzi ngoba ngicabangela zona,” kusho yena.
Ngesikhathi ILANGA lihambele le ndawo, izingane eziningi bezingayile esikoleni ngoba zithi abazali bazo bathe mazihlale phansi.
ILANGA likhulume nothishanhloko waseSingele, uNkz Dudu Meyiwa, okhale ngokuthi kunzima kakhulu ukufundisa ngaphansi kwalesi simo ababhekene naso.
“Ngisho amanzi okuphekwa ngawo, akhiwa kula mathangi. Kungcono-ke ngoba ayaphekwa yize nje kwesinye isikhathi esuke enoshobishobi. Izingane ziyaye ziphume ziyowakha emihosheni, zibuye nawo angcolile ngoba kuphuza nemfuyo kule mihosha.
“Sesilubikile kaningana nje udaba lwethu ngisho naseMnyangweni wezeMfundo, sicela ungenelele kodwa bekungakenzeki lutho,” kusho yena.
Leli phephandaba lifice amalungu omphakathi ebhikisha ngaphandle kwaseSingele, ethi asekhulume aze akhathala nekhansela lendawo kanti nakuMasipala weTheku kawalutholi usizo.
Kuze kwashaya isikhathi sokushicilela okhulumela umasipala weTheku engatholakali ukuphawula.