BAHLELA OWOKUYIGUDLUZA BUKHOMA IMEYA YETHEKU
USOMLOMO kaMasipala weTheku, uMnu Thabani Nyawose, uthe usazoluhlela usuku okuzodingidwa ngalo isiphakamiso seqembu i-Active Citizens Coalition (ACC) sokuba kugudluzwe imeya yalo masipala, uMnu Mxolisi Kaunda esikhundleni sayo emuva kokuthi umhlangano wangoLwesibili ugcine uhlehla ngenxa yokuthi i-Action SA iveze ubumqoka bokuthi kumele wenziwe bukhoma, hhayi ngohlelo lwezobuchwepheshe.
Lo mhlangano wangoLwesibili ubuwenzeka ngokohlelo lwezobuchwepheshe besimanje (virtual). Kuwona uMnu Zwakele Mncwango we-Action SA, uphakamise ukuthi uhlehliswe ukuze uqhubeke bukhoma.
Utshele ILANGA ukuthi lesi siphakamiso usenze ngoba efuna ukuthi uma sekuvotwa, amakhansela akwazi ukuvota ngonembeza bawo, hhayi ngokweqembu.
“Uma kuvotwa ngohlelo lwevirtual, kuvota umuntu oyedwa ovotela lonke iqembu kanti uma sisemhlanganweni bukhoma, amakhansela ayakwazi ukuvota ngokwemizwa yawo. Siyathemba ukuthi njengoba usomlomo evumile ukuthi umhlangano ube bukhoma, sizoba nawo amakhansela azovota nathi nawo abonayo ukuthi uMnu Kaunda uhlulekile wukuphatha lo masipala," kusho yena.
Umhlangano wangoLwesibili ugcine uphela ngenxa yesikhathi kanti bekunezinye izihloko obekumele zidingidwe kuwona, kodwa zagcina zingadingidwanga.
UMnu Nyawose uveze ukuthi ezinye zezinto ezingadingidwanga, zizodingidwa emhlanganweni wakusasa obuhlelelwe ukuthi uqhubeke kulowo wangesonto eledlule wokuvotelwa kwephini lemeya nosotswebhu womkhandlu.
Ethintwa yileli phephandaba uMnu Nyawose, uthe: “sizokhuluma ngezinye zezihloko kodwa oluthinta imeya ngisazobheka ukuthi sizoluhlela nini usuku lwakhona njengoba kusasa sizobe sibheke ezithinta ukuvotelwa kwezikhundla ezivulekile," kusho yena. eveza ukuthi bazophinde babheke nombiko wonyaka wokusebenza womkhandlu nesimo sebhajethi.
Uthe umhlangano wakusasa uzoqhubeka njengoba bekuhleliwe njengoba kwagcina kuphoqa ukuthi uhlehliswe ngesonto eledlule.
Kuzokhumbuleka ukuthi amakhansela e-ANC afika sekudlule isikhathi kulo mhlangano emuva kokuzivalela kwikhokhasi eyathatha isikhathi eside. Kulo mhlangano i-EFF yayingabonwa nangalukhalo.