UMKLOMELO WOKWENZA KAHLE KUMATIKULETSHENI UPHENDUKE IMALI YOKUBHALISA ENYUVESI
KUGQUGQUZELWE umkhakha wezolimo nesayensi kubafundi bezikole zasoNdini beklonyeliswa ngokwenza kahle kumatikuletsheni wanyakenye.
Batshelwe ukuthi le ndawo idinga ukuthuthukiswa ngezolimo nokubambisana kososayensi njengoba kungeyasemakhaya futhi isadonsa kanzima kule mikhakha.
Lokhu kuvezwe yimeya yakhona, uMnu Wilson Ntshangase ngoLwesibili eMultipurpose Centre, oNdini eklomelisa abafundi ngokuphasa kahle kwabo. Umfundi emunye kwabawu-10, babongwe ngama-laptop, u-R5 000, i-tablet nezinsizakufunda.
“Kasinankinga neminye imikhakha, kodwa siyafisa ukuthi abantwana bayithande kakhulu le mikhakha engiyibalile ngoba ngikholwa wukuthi ingaletha ushintsho olukhulu emphakathini wasoNdini. Akukho okukhulu esinakho ukweseka imfundo yethu, kodwa kokuncane sikwazile ukubeka inkece encane yokweseka umsebenzi omuhle owenziwa ngothisha nabantwana.
“Lolu hlelo lokuklomelisa silubhekise kulaba bafundi okwamanje, kodwa sinalo nolunye lokusiza ngenkece yokubhalisa enyuvesi kubafundi ababili ewadini ngayinye,” kusho uMnu Ntshangase.
Uthe imfundo kufanele yesekwe yizona zonke izinhlaka zomphakathi ngenxa yokubaluleka kwayo.
“Masilenze lifezeke iphupho labafundi. Kule minyaka esiphila kuyona, kunamathuba amaningi nemikhakha eminingi izingane ezingangena kuyona ukuze nazo zibe ngabasunguli bezinto njengoba sekukhona nobuchwepheshe obahlukene bokwenza izinto,” kusho uMnu Ntshangase.
Izikole ezintathu ezithole u-100% - okuyiJames Nxumalo Secondary School, iThabani Isaac Gasa High neKonfoor High - ziklonyeliswe ngo-R10 000 ohambisana nendondo isikole ngasinye. Omunye wabafudi abahlomulile, uXolani Sibiya waseNkonjeni obefunda eDikana High School, uthe ukuklonyeliswa kwakhe sekulekelele umndeni wakhe ngoba le mali usezobhalisa ngayo e-University of KwaZulu-Natal (UKZN), uyokwenza iziqu zobudokotela.
“Umasipala ulethe enkulu injabulo kimina nomndeni wami ngoba bengingakasizakali ngemali yoxhaso lwesikhwama sikahulumeni esisiza abafundi abadabuka emindenini ehlwempu. Ngiyabonga kakhulu ngabasenzele khona,” kusho uXolani.
Umzali wengane ebifunda eVukuza High School, uNkz Smangele Xulu waKwaNodwengu, utshele
ukuthi baswele imilomo eyizinkulungwane yokubonga uhlelo lokusizwa kwabantwana.
I-Zululand ibalwa nezindawo ezigqame nakuzwelonke ngenxa yomfundi waseMasibumbane High obeyimele ngesikhathi uNgqongqoshe wezeMfundo eyisiSekelo, uNkk Angie Motshekga, eklomelisa abafundi.