IMEYA INXUSE UKUBA IZIKOLE EZENZA KAHLE NEZITABALASAYO ZISEBENZISANE
INXUSE ukusebenzisana kwezikole ezenza kahle nezitabalasayo iMeya yaseNkosi Langalibalele, uMnu Mduduzi Myeza ngesikhathi ihalalisela abafundi abenze kahle kumatikuletsheni eMtshezi ngeledlule.
UMnu Myeza uthi othisha kufanele basizane, bavumele nezingane ezifunda ezikoleni ezingenzi kahle ukuba zithole ulwazi kwezenza kahle.
Uklomelise abafundi abawu-10 bakule ndawo abahambe phambili uMtshezi wonke, kubalwa nabathathu abaphase baze bamenywa emcimbini woMnyango wezeMfundo KwaZulu-Natal, obuseThekwini mhla ka-20 ngenyanga edlule.
“Kuncane esinakho esandleni, kodwa siwumkhandlu wamakhansela, sizibophezele ukulekelela imfundo yaseMtshezi. Nyakenye sinikele ngezicathulo zesikole kubantwana abawu-500 abaswele, savakashela nezikole ezahlukene, sihlola imfundo ukuthi iqhubeka kanjani.
“Konke lokhu kuyimizamo yokuthi umasipala wenze konke okusemandleni ukuthuthukisa imfundo. Ngakho-ke, kuyosibuyisela emuva kuyona yonke imizamo yethu uma kuwukuthi nazo izikole kazibambisani ukuze le ndawo iphakeme yonke,” kusho uMnu Myeza.
Ubongele ngokukhethekile abafundi bakule ndawo abahlonishwe nasezingeni lesifundazwe; okunguMhlengi Chiliza, uSthembiso Mthembu noNtokozo Maphanga. Uveze ukuthi bayaziqhenya kakhulu ngeSicebangolwazi Secondary School, okuyiyona ephume phambili kwisekethe yendawo.
“Umsebenzi wothisha (wangonyaka odlule) uyancomeka. Lokhuke kuyasikhuthaza ngoba ngesikhathi singena ehhovisi lomkhandlu, sizibophezele ukuthi imfundo yiyona esizoyibeka eqhulwini,” kusho uMnu Myeza.
Kugqugquzelwe abafundi bakule ndawo abaswele imali yokubhalisa ezikhungweni zemfundo ephakeme ukuba bafake izicelo emahhovisi kamasipala.
Uthe abafundi babelwe u-R400 000 ozolekelela abathathwe emanyuvesi kodwa abangenawo amandla okuthola imali yokubhalisa.
Kuklonyeliswe nezikole eziwu10 ezenze kahle. Abafundi banikezwe izindondo ezihambisana nama-laptop okuthiwa bazowasebenzisa emanyuvesi. Omunye wabafundi abahlomulile, uMhlengi Chiliza, uthe okumjabulisile wukuthi bakwazile ukumela indawo yangakubo nasesifundazweni.