Akuphusile ukushisa izithuthi zamazwe
IXWAYISE ngengozi engase idaleke ngenxa yokwanda kwezigameko zokucekelwa phansi kwezithuthi ezibhaliswe ngezinombolo zaseMozambique, iMeya yaseJozini, uMnu Mfananaye Mathe (osesithombeni), ngoLwesibili engxoxweni neLANGA.
UMasipala waseJozini unengxenye enkulu yamawadi asemngceleni ohlukanisa iNingizimu Afrika neMozambique.
Kusukela ngeledlule umphakathi waseMkhanyakude, engxenyeni yaKwaMhlabuyalingana, uqale umkhankaso wokucekela phansi ngomlilo izimoto zaseMozambique ngoba usola ukuthi izimoto zakuleli zintshontshwa ziweliselwe kuleliya lizwe, zingabe zisabuyiswa kuleli.
NgoMsombuluko kubikwe ukuthi le nkinga isikapakele ezingxenyeni zaseJozini. Phakathi kwezinye zezigameko kube ngesokushiswa kwebhasi elilayisha abagibeli abawu-22. Leli bhasi livinjwe maqede lashiswa lidlula oPhondweni, eJozini.
Ekhuluma neLANGA uMnu Mathe, uthe uyakuqonda ukuthi umphakathi udiniwe ngenxa yokwanda kwezigameko zokulahleka kwempahla yawo maqede ikhonjwe kuleliya lizwe, wathi kodwa umlilo ngeke wakhe isizwe, kunalokho kuzolimala okuningi okuhlanganisa nempilo yabantu.
“Engikukhulumayo ngikukhuluma ngokwesikhundla sami sokuba ngusihlalo wekomidi lezokuphepha kulo masipala.
"Ngiyakuqonda ukuthi umphakathi ukhathazekile ngenxa yokulahlekelwa yizimoto zawo, kodwa ngiyawunxusa ukuba ungazibandakanyi nezigameko zokushisa izimpahla.
"Lokho kuzokwandisa umoya omubi, kugcine sekonakala nezingane ezincane ezizokhula zinolwazi lokuthi izimo zilungiswa ngomlilo. Sinxusa izinhlaka zomthetho ukuba zibambisane namakomidi ezomthetho emazingeni aphansi ukuze kuzonqotshwa le nkinga yobugebengu.
"Inkulu kakhulu inkinga ebhekene nabantu baseJozini mayelana nobugebengu obuhlalise lubhojozi umphakathi, kodwa sinethemba lokuthi ngokubambisana sizobunqoba,” esho.
Uthe umasipala wakhe unezinhlelo eziningi zokusiza abantu abadinga izinsiza.
“Ngiyafisa ukusho nokuthi umasipala wethu ubeke imali yokusiza intsha, ikakhulukazi abafundi abanesifiso sokuyoqala imfundo yabo ezikhungweni zemfundo ephakeme. "Sinezinhlelo zamaphrojekthi okufanele siwahambise emphakathini okuhlanganisa nezindlu ezizobe zivulwa. Lezi zindlu zikhandwe yiwona lo Masipala waseJozini,” esho.
UMnu Mathe ukhuze namakhansela ukuba angawushalazeli umphakathi. “Noma ngabe kawuphethe lutho, hamba uye ebantwini ngoba bona bakholwa ngokuthi bakubone,” esho.