"Kuyalibulala ibhizinisi ukubamba imisebenzi eminingi kanye kanye"
UNyanisa uthi kuyalikhulisa ibhizinisi ukulihlonipha nokwenzisisa umsebenzi uwuqede, ungajahi imali
UKUSWELA imali yokufunda nokudonsa kanzima emndenini wakhe kwamfaka ugqozi lokuyofuna amatoho, asebenze ukuze alekelele umndeni wakhe usomabhizinisi osenenkampani yakhe yokufaka amakhabethe.
UMnu Mlungisi Zitha Nyanisa (38), wasoFafa, eXobho - osezinze eThekiwni ngenxa yomsebenzi uthi uma unezandla zisebenza, akumele ulindele ukuqashwa ukuze ukwazi ukuziphilisa.
UMnu Nyanisa usenenkampani yakhe efakela abantu amakhabethe, iZitha Kitchen Design, ePinetown. Usedale amathuba omsebenzi kubantu abawu-10 ngomsebenzi athi akawuyelanga esikoleni, kodwa ukhuliswa wukuzimisela.
UKUNGENA KWAKHE KUWONA
Uthi ngemuva kokuphothula u-matric, waswela imali yokuqhuba izifundo zakhe, wangahlala, wayofuna amatoho okushanela enkampanini efaka amakhabethe.
Uthi wazitshela efika nje kuyona ukuthi ngeke agcine ngokuba ngumashanela, uzolisebenzisa ithuba lokufunda ukuthi akhiwa kanjani amakhabethe, ukuze ngelinye ilanga ezovula eyakhe.
Utshele ILANGA ukuthi esakhula, bekuyisifiso sakhe ukuthi ngelinye ilanga avule inkampani yakhe, aqashe abantu.
“Ngancika kakhulu kwenye insizwa yakwaShezi eyayiqashiwe ifaka amakhabethe khona enkampanini. Yayingithatha njalo ingikhombise umsebenzi nokuthi likalwa kanjani ipulangwe.
"Kwakuthi njalo uma sesiphumile emsebenzini, ingithathe iyongikhombisa ukuthi kusetshenzwa kanjani. Yayingithatha ngiyosebenza nayo, ingiholele lokho okuncane, ngikwazi ukuzibheka.
"Lwaqala lapho uthando lwami ngalo msebenzi wepulangwe. Ngazinika isikhathi sokuwufunda nokwazi kabanzi ngokusebenza kwepulangwe nangezinhlobo zalo ngokuhluka kwalo - uma ufakela umuntu amakhabethe.
"Ngenza ucwaningo ngalo msebenzi nokuthi kusetshenzwa kanjani, nezinto okumele uziqaphele kuwona. Ngathola ukuthi iningi labantu bakithi abamnyama elenza lo msebenzi, kunamaphutha amaningi eliwenzayo. Kugcina kube sengathi kaliwahloniphi amakhasimende nomsebenzi walo,” kusho uMnu Nyanisa.
YINI EYEHLUKILE NGOMSEBENI WAKHE KUNABANYE?
“Okokuqala nje, mina uma usungichazelile ukuthi ufuna amakhabethe anjani, ngiyakweluleka ngepulangwe ongalisebenzisa, ngikuchazele ngobuhle nobubi balo ngokuhamba kwesikhathi.
"Ngiyakudwebela ikhishi lakho ngikukhombise ukuthi lizobukeka kanjani uma sengilifakile. Ngaphambi kokuba ngiqale umsebenzi, ngiyaqinisekisa ukuthi ngemuva kwezinsuku ezingaki ngizobe sengiwuqedile umsebenzi.
"Angiwuqali umsebenzi kwenye indawo ngingawuqedile omdala. Iyawubulala umsebenzi le nto yokuthi ubambe imisebenzi eminingi
ngesikhathi esisodwa.
"Lokhu kudala ukuthi kugcine kukhona lapho ongenzisisanga khona kahle ngoba ujaha imali. Abantu engisebenza nabo siyavumelana ngaphambi kokuba siqale umsebenzi ukuthi usuku kumele luphele sesisebenze indawo engakanani,” esho.
Uthi okunye okumsiza kakhulu ngalo msebenzi wakhe, okwenza ubukeke uhlukile kunowabanye, wukuthi usebenzisa inkampani eyodwa, iSouthern Kitchens, ePinetown, athenga kuyona amabhodi okufaka amakhabethe.
Uthi noma kukhona ikhasimende lakhe elikhala ngakho, uyakwazi ukubuyela kule nkampani athenge kuyona amabhodi, bakulungise ngoba unobudlelwano obuhle nayo.
Uthi okuhle ngayo, uyakwazi ukulibona ipulangwe lingakakhavwa, alilandelele lize liyoqedwa ukukhavwa, lifike kuyena seliyilokhu okufunwa yikhasimende.
YINI EBULALA UMSEBENZI KUBANTU ABAMNYAMA?
Uthi ukuhlonipha umsebenzi kubalulekile ngoba kuyalikhulisa ibhizinisi lakho.
“Ukugcina isikhathi osuke uvumelene ngaso nomuntu okunike umsebenzi kuyasiza. Uma kwenzeka kwedlula leso sikhathi, mazise ukuthi ngenxa yezingqinamba ohlangabezane nazo ngomsebenzi, isikhathi ebenivumelene ngaso ukuthi uqede, ngeke kusaba yisona.
"Kuyawubulala umsebenzi ukujaha ukuqeda ngoba uthi ujaha ukubamba omunye. Sibaningi singabantu abamnyama esenza lo msebenzi, kodwa into embi esidume ngayo wukuthi umsebenzi kasiwuqedi ngesikhathi esifanele futhi sijaha ukuhambisa imali phambili umsebenzi ungaphelile.
"Abebala elimhlophe basihlula ngalokho. Uma usuqedile ukusebenza lapho uqashwe khona, yenza isiqiniseko sokuthi ushiya indawo obusebenza kuyona ihlanzekile ukuze nomsebenzi obuwenza uzobonakala kahle,” ephetha.
OKUNYE NGAYE
* Useqeqeshe intsha eningi yangakubo
ngalo msebenzi wakhe. * Usezihlelweni zokuvula isikole esizofundisa intsha ngemisebenzi yezandla, ikakhulukazi owokufaka
amakhabethelo asenolwazi lwawo.
* Njalo ngonyaka uma kuvulwa izikole, uhambela izikole zangakubo athengele abafundi abaswele imifaniswano yesikole ngenxa
yokuthi uyazi ukuthi kunzima kanjani ukufunda ungenawo umfaniswano wesikole. * Usethengele abafundi abawu-20 izicathulo zesikole azozihambisa maduze.