Ishayisa amakhala eyesimo senhlekelele ngenxa kagesi
KUYIQINISO elingephikwe ukuthi ukubakhona kukagqamcishi (load shedding) eNingizimu Afrika, yisimo senhlekelele (state of disaster), okumele silungiswe ngokuphuthuma ukuze umnotho wezwe usimame, kudaleke amathuba emisebenzi, kulwiwe nobubha. Noma kunjalo, isimemezelo se-ANC, sokuthi uMengameli Cyril Ramaphosa uphezu kwezinhlelo zokumemezela isimo senhlekelele ezweni ukuze uhulumeni ukwazi ukuthatha izinyathelo ezinqala ukuxazulula inkinga kagqamcishi, kasiniki ithemba lokuthi kukhona uguquko esizolubona.
Izizathu zalokhu ziningi; esokuqala wukuthi inkinga enkulu yenkampani kahulumeni ephehla amandla kagesi, i-Eskom, wukuthi kayinazo izisebenzi ezinamakhono nesipiliyoni sokwengamela iziteshi zokuphehla ugesi, kanti nenkohlakalo isimile izingxabo ezinde, kunzima ukuyisiphula.
Okunye wukuthi le nkampani isiphelelwe yinkece, ngenxa yayo belu inkohlakalo nokuphathwa yizimfundamakhwela.
Esinye isizathu esiqeda ithemba, yizigameko zobusela obushaqisayo okwenzeka ngesikhathi sesimo senhlekelele esamenyezelwa ngumengameli phambilini, ngesikhathi kugasela ukhuvethe ngo-2020.
Sekuwumlando ukuthi isimo esiphuthumayo senhlekelele ngesikhathi seCovid-19, savulela osomathuba namasela angenanembeza intuba yokweba izigidi zemali yabakhokhi bentela, njengoba kunobufakazi bokuthi izikhulu zikahulumeni ezazigwazelwa, zazabela obhululu bazo amathenda acebile, kuyidili likaMkhipheni.
Ngabe yini ehlukile ezokwenziwa yilo hulumeni kulokhu, ukuqinisekisa ukuthi kasibanjwa inkunzi yimigulukudu njengoba kwenzeka ngesikhathi somkhuhlane ngo-2020-21?
Iqiniso abanye bethu abangafuni ukukhunjuzwa lona wukuthi ugqamcishi wenzeka okokuqala ngqa kuleli ngo-2007, kusaphethe uMnu Thabo Mbeki.
Kwenzeka le nkiyankiya nje, uhulumeni we-ANC wawukade wexwayisiwe yibhodi ye-Eskom ngo-1998, ukuthi eminyakeni eyishumi elandelayo, kuyoba nale nkinga uma uhulumeni ungezi lutho ukwakha ezinye iziteshi zokuphehla amandla kagesi.
Esikhundleni sokulalela izazi, uhulumeni wasonga izandla, wahuqa ubuthongo.
Manje sivuna lokho okwatshalwa yilo hulumeni, ngokuhlala dekle noma wexwayiswa ngengozi ezayo.
Sekuphele iminyaka ewu-16 le nkinga yaba khona, silokhu sitshelwa ukuthi iyalungiswa, kodwa manje isimo sibi kakhulu kunakuqala.
Ngenxa yalo mlando, kungani kufanele abantu bethembe ukuthi kulokhu, uhulumeni uzoqhamuka nokwehlukile?
Njengoba sesike sasho izikhawu eziningi kule ngosi phambilini, okuyoxazulula inkinga kagesi wukuvunyelwa ngokuphelele kwezimboni ezizimele ukuba zincintisane ne-Eskom ekuphehleni nasekudayiseleni abantu ugesi.
Yilokho kuphela okungasitakula kulobu bumnyama obungenafu, okunye kufana nokusinisa amahleza.