UMALEMA UHLUSHWA WUMGOLO WAMANDLA OKUPHATHA
MHLELI: Ngicela ukushaya ngamafuphi, ngiphawule ngesenzo somholi we-EFF, uMnu Julius Malema sokuyalela amalungu eqembu lakhe abengamasekela ezimeya komasipala abaphethwe yi-IFP ukuba ahoshe imfe ezikhundleni zawo.
UMalema usedlalisa okukajolwane wona ocuthele ukudla izikwehlela, uhambe untanta, ubheka lapho kunobuthaka khona ukuze uphile.
Usekhombise amahlandla amaningana uMalema ukuthi ubulawa wumgolo wokulawula kanti akakwazi ukulawula, kodwa wazi ukucindezela, okuyiyona into exosha abantu kwi-EFF.
Lo mkhuba wakhe wawuqala esakwi-ANCYL ukuthi azibone ephezu kwabo bonke abantu.
Isenzo sakhe sakamuva sokuthi bafuna ukuphiwa uMasipala waseMhlathuze, siwubuwula obuphindwaphindiwe.
Ukusondela kwakhe kuMasipala waseMhlathuze kungaphazamisa ukusebenza kwechweba nezimboni ezigcwele eRichards Bay.
Muhle khona eLimpopo koMango nakoPopo. I-IFP ingamane ingawulawuli umasipala kunokuba iphisane ngawo kwi-EFF.
Phela akufihliwe ukuthi i-EFF lapha KwaZulu-Natal ibheke uMasipala weTheku noMhlathuze.
UMhlathuze unezihlalo eziwu-67, i-EFF ineziwu-6 kuphela, kodwa ifuna ukulawula ngokugcwele.
Umuntu onezihlalo eziwu-6 angalawula umasipala onezihlalo eziwu-67? Kanjani kodwa?
Umgolo kaMalema uzolibulala iqembu ligcine selifana neCOPE, yona eyashisisa okomlilo wamaphepha.
Abanye bazothi uMalema udlala ipolitiki, kodwa mina ngibona edlala ubuwula.
Udlalisa okomfana ongawudlalanga umlabalaba, kodwa-ke kufanele enze njalo ngoba i-EFF uyiphethe njenge-spaza.
Sengathi i-ANC neDA banganqaba ukusebenzisana ne-EFF.
Kuyangijabulisa ukuthi i-ANC incamela ukusebenzisana nePA ne-Al Jama kwabanye omasipala ngoba ibona ukuthi kulele kunye kwi-EFF.
Sengidabukela abafowethu abalandela leli qembu, sebebonakala njengezinto nje ezingasile ngenxa yomholi wabo olambele amandla okuphatha.
Ngithanda nokuncoma indlela i-IFP esingathe ngayo lolu daba loMhlathuze.
I-EFF noma ingahosha imfe, lokho ngeke kuyiphazamise i-IFP ekusimameni kwayo ngoba (i-IFP) iphethwe ngedlela ehlelelile ngaphansi kobuholi bukaMnu Velenkosini Hlabisa.