Ushovwe enkulisa owodumo kwiDowns
Kuthiwa uVilla waxabana nomqeqeshi weGalaxy kubuka abadlali
USHOVWE eqenjini lenkulisa umdlali weTS Galaxy ozakhele igama kwiBidvest Wits nakwiMamelodi Sundowns ngemuva kokuhilizisana nomqeqeshi uSead Ramovic egunjini lokushintsha.
ILANGA lithole ngomthombo walo ongaphakathi ekhempini yeGalaxy ukuthi uSibusiso “Villa” Vilakazi (osesithombeni) wehliselwe ezinganeni ngoba eqophisane nalo mqeqeshi waseGermany ngemuva komdlalo owaphela ngo-0-0 ibhekene neSwallows FC eDobsonville, eGoli, ngomhla ka-15 wenyanga edlule.
Umthombo uthe: “Indaba yasuswa wukuthi umqeqeshi wasola uVilla ngokungayilandeli imiyalelo yakhe, okwenza iqembu lahluleka ukushaya ngisho igoli elilodwa ekubeni lidinga amaphuzu agcwele ukuze lixaxame endaweni embi yezembe.
“Kwasethusa nathi ukubona uVilla ehluthukelwa wumoya ngoba ungumuntu ophansi.
“Ngicabanga ukuthi yamnenga indlela okwaphunywa naye iqhubu ngoba baningi abanye abadlali ababedlala umbozo ngaloluya suku.”
Uqhube wathi: “Isixakile indaba yokuthi noSihlalo uTim Sukazi avune umqeqeshi ngoba akenzanga iphutha uVilla ngokuziphendulela.
“Njengoba imiphumela igqoza, umxosha kanjani umuntu onesipiliyoni njengoVilla?
“Selokhu ayalelwa ukuba angasondeli eqenjini elikhulu, uVilakazi useqiwe yimidlalo emithathu.”
Lo mdlali oyingozi uma esuka esiswini eqonde emapalini, ungomunye wabadlali abanohlonze owethulwa nguSukazi, owathi kulindelwe lukhulu kuyena esuka kwiSundowns ekuqaleni kwale sizini.
Imizamo yokuthola uMinenhle Mkhize okhulumela le kilabhu ukuba aphawule ngalolu daba kanjalo noVilla kayiphumelelanga kwaze kwashaya isikhathi sokuloba lolu daba.