Akafuni nokuyizwa eyeTop 8 oweMaritzburg
UFadlu uthi okwamanje okusemqondweni kubona wukubalekela izembe
AKAFUNI nokuyizwa eyokuqeda isizini ekwiTop 8 uFadlu Davids ongumqeqeshi weMaritzburg United ayijoyine idonsa kanzima kwiDStv Premiership njengoba ekholwa wukuthi yinto eqhelelene nabo.
ITeam of Choice izogadulisana nomkhaya AmaZulu FC koweDStv Premiership kusasa ngoLwesihlanu ngo-19h30 eHarry Gwala Stadium, eMgungundlovu.
Lo mdlalo uthathwa njengomkhulu KwaZulu-Natal njengoba iMaritzburg ifuna ukubaleka emngceleni wezembe kanti AmaZulu afuna ukuqeda phezulu kwazise inhloso yabaphathi bawo wukubona le kilabhu idlala emiqhudelwaneni yeCaf.
UDavids, osanda kukhuza ibuya kwiMaritzburg, uthi akafuni ukulokhu ezikhohlisa ecabanga ngokuqeda bekwiTop 8.
“Kangikholwa ukuthi kufanele silokhu sikhuluma ngeTop 8 ngoba kufanele sizazi lapho esiphuma khona.
“Abadlali basathuthumela, kakuyona into encane ukuhlala emsileni we-log izinyanga eziyisithupha, kakuyona into ongayedlulisa kalula leyo.
“Namanje kasikasindi ezembeni, sisephansi, kusafanele sicathule kancane kuze kulunge.
“Ngeke ngokunqoba imidlalo emithathu ilandelana besucabanga ngeTop 8, kakufanele neze sizikhohlise.
“Sinombandela esizibekele wona wokuthi sizame ukufinyelela emaphuzwini awu-30 ngokushesha.
“Uma sesifike lapho sesingaqala-ke sibuke ezinye izinto, kodwa njengamanje into eseqhulwini wukuhlenga ikilabhu ingagencwa yizembe,” esho.
Uthi balindele umdlalo omnandi kumaZulu ngoba anabadlali abahle futhi abaseqophelweni eliphezulu.
“Sizilungiselela ngendlela efanayo, njengoba siya kulo mdlalo, kakukhathalekile ukuthi sibhekene neKaizer Chiefs noma yiMarumo Gallants.
“Yonke imidlalo imqoka noma ngabe ubhekene nekilabhu esendaweni yesine kwi-log noma ekunombolo-16.
“Sizilungiselele kahle kodwa engingakusho wukuthi (aboSuthu) bayiqembu elihle elinabadlali abaseqophelweni eliphezulu.
“Baqinile kuyona yonke imikhakha; ngingasho nje ukuthi banesikwati esihle futhi silindele umdlalo omuhle kubona,” esho.