INTOKOZO ENIKWA IBHANDE LE-IBF ALINQOBA NYAKENYE
KUBE yinjabulo kuBongani Mahlangu (osesithombeni) egcina elethelwa ibhande le-International Boxing Federation (IBF) All Africa obesekuphele izinyanga eziyisithupha alinqoba.
Leli bhokisa laseBoipatong, eGoli, belisanda kutshela ILANGA ukuthi selikhathele ukwenziwa upopayi yiRumble Africa Promotions (RAP) eyayiliqhathe no-Ayabonga “Jay Jay” Sonjica e-Orient Theatre, e-East London, ngoNtulikazi (July) wonyaka odlule.
UMahlangu wathi ubona sengathi abeRAP benza ngamabomu ukungamniki ibhande kwazise wabhidliza izinhlelo zikaSonjica njengoba amkhipha ukwazi ngokumngqimuza emzuliswaneni wesithupha.
Kuqhilike izihlathi wajabulisa okwengane encane ijabulela amaswidi ngesikhathi isikhulu se-IBF e-Afrika, u-Andre de Vries, sesimnika ibhande eHotbox Gym kaCollin Nathan ngoLwesibili.
Usuke lapho wanikela ejimini kwazise ulungiselela ukuvikela isicoco sikazwelonke seJunior Featherweight kuMduduzi “Sgora” Mzimela empini ehlelelwe ukuba seThekwini ngomhla ka-25 kwephezulu.
Phambilini bekuhlelwe ukuba avikele isicoco ku-Innocent “Tycoon” Mantengu eVryheid kodwa kuthiwa iBoxing South Africa iyichithile le mpi ngoba uMantengu ubuya endukwini amahlandla amabili kulandelana.
UMzimela waseMpangeni, ocijwa nguSkeleton Mngomezulu, utonyulwe ekleliswe endaweni yesithathu.
Empini yakhe yokugcina eThekwini wehlule ngamaphuzu uSanele Maduna wagoduka nesicoco saKwaZulu-Natal.
Uzobe ezalelwe yinj’ endlini kwazise ubhekene nomakadebona osekwaze ukunqoba izicoco ezintathu futhi osebuya ukuyomela iNingizimu Afrika kuma-Olympic Games ayengo-2004 e-Athens, eGreece.