I-Boxing SA ichithe impi yenhlangano 'engaziwa'
Ibhokisa lakuleli lesifazane selitholelwe isitha esisha
ICHITHIWE imizamo kaphromotha omusha esibhakeleni obefuna ukuqhatha ingqwele yakuleli uMapule “Thunder” Ngubane empini yesicoco seWorld Alliance Boxing Association (WABA).
UFundi Malinga uthi utshelwe ezinhlamvini zamehlo yiBoxing South Africa (BSA) ukuthi kayiyithathi iWABA njengenhlangano yesibhakela esemthethweni ngakho kumele ayikhiphe ezinhlelweni zomqhudelwano wakhe ozokuba seLadysmith Indoor Sports Centre ngoMgqibelo ozayo womhla ka-11.
UMalinga ubeqhathe uMapule no-Emily Kabwalo empini yesisindo seMiddleweight imizuliswano eyishumi.
Manje leli bhokisa lesifazane laseMgungundlovu elizinze eGoli, selitholelwe impi nesitha saseTanzania u-Amina Mohamed.
Bekuzoba yimpi yesibili kulandelana ukubhuntsha yaleli bhokisa.
Phela ngoZibandlela (December) kwabhuntsha ayehlelelwe yona yesicoco seWorld Boxing Organisation (WBO) Intercontinental Junior Middleweight noMaricela Cornejo wase-USA.
Le mpi yayizoba ngaphansi kohide lwezimpi zezicoco ezahlukene ezazihlelwe yiJoy4Joy Promotions eyangena kwelikhulu ihlazo ngokubhuntsha komqhudelwano okwakusetshenziswe kuwo igama leSilo samaZulu nelesihlabani sase-USA esesawagaxa emgibeni amagilavu, uFloyd “Money” Mayweather.
Nokho uMapule wavala unyaka enoKhisimusi omnandi njengoba wayithola iphelele imali yakhe, yize engangenanga eringini.
UMalinga uthe ngokohlelo lwakhe, impi enkulu yosuku isazoqhubeka.
Ingqwele kazwelonke kwiMiddleweight, uJohn “Section 29” Bopape, izovikela isicoco ku-Ayanda “Nyamazane” Mthembu.
Lapha kubhekwe ngabomvu ukuthi uBopape, ongowaseGomora, e-Alexandra, eGoli, uzoqhubeka yini nokuzichanasela kumabhokisa aKwaZulu-Natal.
Phela wathatha lesi sicoco ngokumuhluza uNkululeko “Bulldog” Mhlongo waseZiqwaqweni, eShowe, empini eyayiseBloemfontein, walandela ngoSinamiso Ntuli waseMnambithi.
UMthembu, odabuka eMandeni kodwa ocijwa e-Ethekwini Boxing Gym, kaThulani “Nkunzi” Magudulela ongasekho emhlabeni, uzobe esezama okwesibili ukuba yingqwele kazwelonke.
Wakhala ngaphansi kuSean Ness eGoli ngo-2016.
Sezizonke izimpi zeSugarboy Promotions zihlelwe kanje:
Siphelele Myeza v George Kandula (straweight,6 rounds),
Andile Majozi v Zwelakhe Nhlapho (featherweight,6 rounds),
Kwenzokuhle Qwabe v Chris Golding (lightweight,6 rounds),
Mhlengi Ndlovu v Caiphus Manale (welterweight, 4 rounds).