Kakucaci ukuthi kuzowusiza kuphi umnotho okuhlongozwa wuhulumeni
Kunesiphakamiso sokuthi zonke izinkampani zombuso zibe ngamankonyane enkampani eyodwa
UHULUMENI usushicilele okuhlongozwa ukuthi kube wumthetho ozovulela ukubunjwa kabusha ukuphathwa kwezinkampani zombuso. Okuhlongozwayo wukuthi zonke izinkampani zikahulumeni zibe ngamankonyane enkampani eyodwa, okuyisinyathelo okungacaci ukuthi sizokwenyusa kanjani izinga lokusebenza kwezinkampani zikahulumeni njenge-Eskom neTransnet.
Lo mthetho ulandela isimemezelo sikaMengameli wezwe, uMnu Cyril Ramaphosa, ngoNhlolanja (February), lapho akhononda ngokuthi izinkampani zikahulumeni ziyingxenye exegayo eketangeni lezwe.
Wathi izinkampani eziningi zikahulumeni zithwele nzima ngenxa yemalimboleko, wukungatshalwa kwemali entuthukisweni yengqalasizinda, yimiphumela yemizamo yokuthunjwa kwamandla kahulumeni yidlanzana (phecelezi, state capture), kanye nokungabi nezisebenzi nabaphathi abanamakhono.
Sikhuluma nje, osomabhizinisi baseThekwini sebetshele uhulumeni ukuthi akaxoshe abaphathi beTransnet, okuyinkampani ephethe amachweba kanye nezitimela ezithwala impahla, amalahle kanye netshe lensimbi. Sekuneminyaka nabezokumbiwa kwamalahle netshe lensimbi bekhono-nda ngokuthi iTransnet iyehluleka ukumelana nezidingo zabo.
Nechweba laseThekwini kalisebenzi ngendlela egculisa osomabhizinisi. Libalulekile emnothweni wezwe njengoba ingxenye enkulu yezimpahla eziphuma ne-zingena kuleli zidlula kuleli chweba.
Ne-Eskom ngo-kunjalo isineminyaka yehluleka ukukhiqiza ugesi owanele izidingo zezwe, okungesinye sezizathu ezimqoka, ezichaza izinga eliphansi lokukhula komnotho wezwe.
IBhange leZwe lithi ukwehluleka kwe-Eskom kuzoxebula amaphesenti amabili ezingeni lokukhula komnotho wezwe nonyaka.
Nenkampani yezikhali zempi, iDenel, nayo iyantenga ngakwezemali, kangangoba isineminyaka ingakwazi ukumelana nezidingo zamakhasimende ayo.
Ongoti kulo mkhakha bathi le nkampani sekuyobanzima ukuthi iphinde ithole amanye amakhasimende, kanti nalawo ehwebelana nawo manje angase angabuyi.
UMnu Ramaphosa wathembisa ngoNhlolanja ukuthi uhulumeni wakhe uzokwenyusa izinga lokusingathwa kwalezi zinkampani ngokulandela isiphakamiso sesigungu eseluleka uMengameli ngokuphathwa kwezinkampani zikahulumeni (phecelezi, Presidential SOE Council).
Lesi sigungu saphakamisa ukuthi enye yezindlela uhulumeni angenyusa ngayo amasokisi ekusingathweni kwensebenzo yezinkampani, wukubumba kabusha indlela eziphethwe ngayo.
Saphakamisa ukuthi zonke izinkampani zikahulumeni zibe ngaphansi kwenkampani eyodwa. Akuqali-ke lokhu. Eminyakeni eminingi eyedlule, uMnu Jeff Radebe, esenguNgqongqoshe osingethe izinkampani zikahulumeni, waphakamisa ngo-1999 ukuthi uhulumeni ulandele izinyathelo zezwe lase-Austria. I-Austria ngaleso sikhathi yayinenkampani eyabe inamankonyane. Isiphakamiso sikaMnu Radebe
asizange silandelwe.
Kulandela isimemezelo sikaMnu Ramaphosa, ngongqongqoshe osingethe ukuphathwa kwezinkampani zikahulumeni, uMnu Pravin Gordhan, useshicilele ukuthi okuhlongozwayo kube wumthetho ozovulela ukusungulwa kwenkampani enkulu kahulumeni. Ngaphandle kwezinyathelo eziphathelene nezinguquko kwa-Eskom, phakathi kwazo esingabala ukubekwa komphathi omusha kanye nokwehlukaniswa kwenkampani izigaba ezintathu, umthetho ohlongozwayo ulindeleke ukuthi ubeyisenzo esibalulekile esiqhamuka kuMnu Gordhan, njengoba umnyango wakhe uzovalwa emuva kokhetho lonyaka ozayo.
UMnu Ramaphosa wamemezela ukuvalwa kwalo mnyango ekuqaleni konyaka.
Umthetho ohlongozwayo kuhloswe ngawo ukuthi kucaciswe amagunya kahulumeni ngokuphathwa kwezinkampani zikahulumeni, amagunya amalungu amabhodi, kanti futhi uphinde ulawule ubudlelwane phakathi kwamabhodi kanye nohulumeni.
Lo mthetho uzogunyaza ukungeniswa kwezinkampani zikahulumeni ngaphansi kwale nkampani enkulu, okuyisinyathelo uhulumeni athi sizovula ithuba lokuthi zonke izinkampani zikahulumeni zisingathwe ngendlela efanayo.
Akucaci nokho ukuthi lolu shintsho luzoguqula kanjani insebenzo yezinkampani zikahulumeni. Ukubunjwa kwenkampani entsha okuzofakwa ngaphansi kwayo zonke ezikahulumeni akuzukwenza nguquko etheni.
Umehluko ungaqhamuka kuphela uma uhulumeni ubhekana ngqo nezizathu eziyizingqinamba ensebenzweni yalezi zinkampani.
Ziyaziwa izingqinamba zeTransnet. Kuloliwe othutha amalahle esuka ezima-yini eMpumalanga eyiswa echwebeni laseRichard's Bay, ingqinamba ngabantu abantshontsha izintambo zethusi kolayini bezitimela, okumisa nse insebenzo yazo. Yile ngqinamba yezigebengu uhulumeni okumele ubhekane nayo ngqo.
Nakwa-Eskom, sekukaningi kukhonjwa ukuthi kunabantu abakhinyabeza insebenzo yeziteshi ezikhiqiza ugesi. Kukhiwa kukhona abantshontsha amalahle athunyelwa eziteshini ze-Eskom, bawashintshe noma bawaxube namatshe noma amalahle angakulungele ukungena eziteshini zamalahle. Bathatha lawa asezingeni eliphezulu, bayowathengisa kwamanye amazwe.
Yilezi zingqinamba uhulumeni ahluleka ukubhekana nazo. Akucaci ukuthi ukusungulwa kwenkampani okuzofakwa ngaphansi kwayo zonke izinkampani zikahulumeni kuzokwenyusa kanjani izinga lokukhiqiza ugesi owanele izidingo zezwe, noma insebenzo yezitimela ezithutha impahla, amalahle kanye netshe le nsimbi.