OWE-BAY FC UKHALA NGAMAPHUZU ABAWALAHLAYO
UBALISA ngokulahla amaphuzu emidlalweni okufanele engabe bayayinqoba umqeqeshi weRichards Bay FC edonsa kanzima kwiDStv Premiership.
IBay iguqiswe ngo-2-1 yiChippa United ngoLwesibili eKing Zwelithini Stadium, eMlazi.
IBay yiyona evule inkundla uSanele Barns elibeka enethini kodwa igoli lakhe lacinywa ngamabili ka-Elmo Kambindu.
IBay bekubhekwe ukuba iwunqobe lo mdlalo kwazise ibisanda kujabulisa abalandeli bayo yehlula ngo-1-0 iMoroka Swallows koweligi eDobsoville Stadium, eSoweto.
Nokho iziyekele kulo mdlalo weChippa njengoba ibiwuthwele kodwa yehlulwa wukuvalela amabhola enethini.
UKaitano Tembo (osesithombeni) ololonga iBay ubalisa ngokulahla kwekilabhu yakhe amaphuzu.
“Kuyadumaza ukuthi njalo sehlulwa imidlalo okufanele ngabe siyayinqoba, ngenxa yokuthi sidonsa kanzima ukushaya amagoli. Uma ubheka indlela esidlale ngayo neChippa, bekungafanele sehlulwe.
“Enye inkinga wukuthi sibuye senze amaphutha uma kufanele simake. Igoli abalitholile leChippa lokulinganisa ayilisebenzelanga.
“Okunye-ke wukuthi besibhekene nekilabhu obese kunesikhashana igcinile ukudlala. Lokho kucacile enkundleni ngoba abadlali bethu bebenokukhathala.
“Ngeke ngibagxeke abadlali bami, basebenze kanzima yikhona nje ukuthi umphumela awusivunanga,’’ kusho uTembo.
Uqhube ngokuthi udumele ngoba bebazi ukuthi iChippa iza nani kodwa behluleka wukuyibamba.
“Besazi ukuthi izobe idlala amabhola amade. Ngibatshelile nabadlali bami ejimini ngalokho kangangoba ngisho sengibona isikimu sabo, ngivele ngacacelwa ukuthi bazodlala wona.
“Sibadedele nasesiswini bazicanasela, bewina namabhola.
“Ngikholwa wukuthi uBanda (Abdi) usebenze kakhulu ukuzama ukumaka la mabhola amade, inkinga ibe wukuthi amabhola abewela kubona.
“ULucky (Mohomi) ungene wenza umehluko ngoba sibe sesiqala sidlala, sibacindezela.
“Ngebhadi sigcine sihluliwe kuzofanele sizame ukunqoba umdlalo olandelayo.’
Uthi uThabani Dube, odlala emuva kwiBay, uophume ngohlaka elimele kanti uTembo ukholwa wukuthi uzolulama ngokushesha.