Ulandisa ngokufa kukanina ‘othunyelelwe ngumnakwabo izinkabi’ elotsholwa
UGEQE amagula ngetulo lokubulawa kwakhe umakoti obelotsholwa ngempelasonto, “osinde umnakwabo esemthengele izinkabi” ukuba zizobulala, zagcina zibulele unina, uNkk Khombisile Zuma (63), zingamtholi yena.
NgoMsombuluko ILANGA libike ngodaba lokuboshwa kwabalisa abane abasolwa ngokuba yizinkabi nowesifazane okuthiwa ubezithumile.
UNkz Zinhle Zuma (30), waseHlathikhulu, eMtshezi, utshele leli phephanda ukuthi kubulawa unina nje, bese kunesikhathi eside umnakwabo uNkz Ncamisile Ngcobo (30), waKwaMaphumulo, emsongela ngokumbulala.
Ulandise ILANGA ukusuka nokuhlala ngokwenzekile ngosuku lwesigameko.
Uthi imoto ebihamba abasolwa ibonwe ngabakamkhwenyana obebangwa, ihamba icisha amalambu, ingafuni ukubonakala ngemuva kokuba izinkabi sezidubule unina.
Uthe bezithengelwe ukuzobulala yena ngelanga obekufike ngalo abakhongi kubo, bashiya ilobolo uR30 000.
UNkz Zuma uthi kufike owesilisa ongaziwa ngezikhathi zabo-11 ebusuku ngeSonto, wathi ufuna uZinhle wakwaMchunu, kwathiwa akaziwa lowo muntu.
“Bekukhona abebehleli egcekeni bephuza, yingakho isango belingavaliwe ngaleso sikhathi.
“Umsolwa ube esecela ukuthi bamphuzise, bathi sebuphelile utshwala, washikila waphuma wahamba.
“Kuthiwa kakuphelanga mizuzu mingakanani kwangena abesilisa abathathu bephethe izibhamu, bathi makulale phansi wonke umuntu obesendlini, bafuna imali eshiywe ngabakhongi,” kusho uNkz Zuma.
Uthi yena ubengekho ngaleso sikhathi, ubekubo komyeni wakhe, njengoba kuwumkhuba wangakubo ukuthi uma kuzofika abakhongi, umakoti ahlale emzini.
“Ngahamba ngoLwesithathu. Kusho ukuthi laba abamtshela ukuthi bengilotsholwa, kabashongo ukuthi kangikho ekhaya, ngoba ubengatshelwanga ngumyeni wami ngalokhu obekuzokwenzeka.
“Ngesikhathi abebesekhaya befuna imali eshiywe ngabakhongi, umama ubatshele ukuthi imali ihambe nomalume, okuyilapho kusuke khona umbango ngoba uvele wadonsa ucelemba, ethi akunabantu abazomkhomba ngesibhamu emzini wakhe.”
Ngokusho kukaNkz Zuma, abebekubo bamshayele ucingo ngemuva kokuqhuma kwezibhamu, bembikela ngokwenzekile, okuyilapho etshele khona umyeni wakhe nabafowabo, baphuma beyobheka isimo.
“Ekhaya nakwamkhwenyana wami kakuqhelelene kakhulu.
“Bathe bephuma nje, babona imoto i-Avanza, ebeyihamba ibuye icishe amalambu, basola ukuthi cishe ababulali bakamama bakuyona ngoba beyibonakala ukuthi kakuyona eyasendaweni.
“Babe sebehlaba umkhosi bayilandela, yaze yayofika kwelinye lamagaraji lapho ifike yahlangana khona neyohlobo lwePolo emhlophe, basebeshayela amaphoyisa aseMooi River.”
Uthi baqhubekile nokuyilandela lemoto kwaze kwabe ivinjwa ngamaphoyisa, babanjwa baboshwa.
ILANGA lihabule ukuthi bese siside isikhathi laba bobabili bebanga uMnu Sthembiso Sgubudu, onezingane nabo bobabili.
UNkz Zuma uthi ubazi ukuthi umyeni wakhe nomsolwa kade bahlukana.
“Sekunesikhathi eside kunombango phakathi kwethu. Ubehlale engitshela ukuthi uzongibulala kodwa bengingazitsheli ukuthi kukhona angakwenza.
“Ngangithi kuyabangwa kuphela. Ngivume ukulotsholwa ngoba umyeni ethi sekuphelile phakathi kwabo, ngangingazitsheli ukuthi ngingafelwa ngumama ngoba kuthiwa ngibangiswa ngendoda.”
Leli phephandaba liyibonile ingxoxo yeWhatsApp ephakathi kwalezi zimbangi, lapho bebesongelana khona, kuze kuvele ukuthi kukhona ongakunqeni ukubulala omunye.
Kule ngxoxo laba bebephinde bachaphane nangezinhlamba.
Leli phephandaba liphinde lezwa nemiyalezo eqoshiwe (voice note) ebivela kowesifazane othi ungudadewabo kaNkz Ngcobo, etshela uNkz Zuma ukuthi makahambele kude noyise wezingane zikadadewabo.
“Wena nje uzofa, ufele isende ngoba uyisilima sentombazane, kawufundiswanga ukuzimela, uphila ngendoda.
“Uhlezi uzwa kuthiwa indoda ithathwa emntwini, uthathe indoda okungafanele uyithathe-ke kulokhu.
“Kudala sikuyekile sikubuka ngoba besizitshela ukuthi le nto yenu izophela,” kusho lona wesifazane kulo myalezo.
Uqhubeka aklolode ngokuba nemali kukadadewabo, ethi unezimoto zakhe, kanti yena uNkz Zuma uphila ngokukhangeza kuyise wengane.
ILANGA liphinde lakhuluma noMnu Sgubudu othe yize engeke asho ukuthi besebehlukene, kodwa bekukhona ukuqhelelana obesekukhona phakathi kwakhe noNkz Ngcobo.
“Bona kade bayiqala le nto yabo yokuxabana kodwa ubethi uma emesabisa, kungabikhona umuntu ozitshela ukuthi kukhona ngempela angakwenza.
“Okwenzeke ngempelasonto kangazi nami ukuthi ngingaqala ngaphi ukukuchaza,” kusho yena.
Imithombo yaleli phephandaba iveze ukuthi imoto lena yohlobo lwe-Avanza, uNkz Ngcobo abanjwe ekuyo nezinkabi, ngeyakhe.
Kuvele nokuthi izinkabi lezi ubezithembise ukuthi zizokwehlukaniselana le mali yelobolo ebeyishiywe ngabakhongi.
Okhulumela amaphoyisa uColonel Robert Netshuinda, uqinisekisile ukuthi abasolwa abane baboshwe ngemuva kokumiswa ngamaphoyisa ngeSonto ebusuku eMgungundlovu.
“Batholwe nesibhamu nezinhlamvu kanti omunye wabasolwa ubenegazi ezimpahleni zakhe zokugqoka.
“Abasolwa baneminyaka ephakathi kuka-25 no-32 kanti kubona kunokuthiwa kudala efunwa ngamaphoyisa ngamacala ahlukene okubulala,” kusho uColonel Netshuinda.
Uthe abasolwa bavelile enkatolo izolo ngoLwesithathu, kanti kulindeleke ukuba baphinde bavele maduze sebeyofaka isicelo sebheyili.