ITWETWE NGAMAQANDA NENYAMA NGENXA YOMKHUHLANE WEZINKUKHU
APHEZULU amaphaphu eNingizimu Afrika ngenkinga izwe elingase libhekane nayo yokushodelwa yinyama yenkukhu namaqanda ngenxa yokubhebhetheka komkhuhlane wezinkukhu.
UMnu Izaak Breitenbach, oyimenenja-jikelele kwiSouth African Poultry Association, okuyinhlangano yabakhiqizi benyama yenkukhu namaqanda, uthi zibalelwa ngaphezulu kuka-7 million izinkukhu esezibulewe ngenxa yalo mkhuhlane.
Ekhuluma izolo ekuseni esiteshini sezindaba iSAFM, uBreitenbach uveze ukuthi lesi sibalo sihlanganisa u-5m wezinkukhu zamaqanda, no-2.5m wezinkukhu zenyama.
Uthi lezi zibalo zisho ukuthi le mboni isilahlekelwe yingxenye ewu-30% yezinkukhu ezikhiqiza amaqanda adayiswayo, newu-20% yezinkukhu zenyama.
“Lokhu kunomthelela kwisibalo samaqanda esiwakhiqizayo, nakwinani lenyama esiyikhiqizayo,” kusho uMnu Breitenbach.
Uqhube wathi balindele ukuba lesi simo sidale ukushoda kwamaqanda nenyama ezitolo.
UBreitenbach uveza lezi zibalo nje, uhulumeni ubukade ubike isibalo esingaphansi kakhulu kwalesi.
UDkt Greg Cilliers, ongudokotela wezilwane uthe isimo sibi kakhulu. Ephawula ngesibalo ebesivezwe wuhulumeni, uthe ukhathazekile ngokuthi isimo sivezwa sengathi silawulekile, ekubeni igciwane lalo mkhuhlane ligijima, futhi lingabambeki.
Uthe kudingeka ukuba uhulumeni ungenelele ngokushesha, kugunyazwe ngokusemthethweni umgomo wezinkukhu walo mkhuhlane ukuze ukwazi ukusetshenziswa.
Ukubulawa kwalezi zinkukhu kubikwa ukuthi kuzodala inkinga yokushayisana kwizinga lomkhiqizo odingekayo nomkhiqizo okhona emakethe – okuwukuthi kuzoba nokushoda komkhiqizo ezimakethe bese lokho kwenyusa intengo, okuyinto ezochaphazela abathengi.
Usomnotho wezolimo eFNB, uMnu Paul Makube, uthe umthelela wale nkinga kulindeleke ukuba usheshe ubonakale emkhiqizweni wamaqanda.
Mayelana nomkhiqizo wenyama, uMakube uthe izinkomba ziveza ukuthi kusenesitokwe esanele sezinkukhu zenyama okungaze kushaye isikhathi samaholidi kaZibandlela (December), wathi kodwa isimo singase sibe sibi kakhulu ekuqaleni konyaka ozayo, uma lo mkhuhlane uqhubeka nokubhebhetheka.