UMNYANGO UTHI KAWUNALO UVALO NGABAFUNDI ABADUDULIWE
KUZOBHALA inqwaba kamatikuletsheni edudulwe nyakenye ezivivinyweni zokuhlolelwa ukuphela konyaka.
UNgqongqoshe wezeMfundo eyisiSekelo, uNkk Angie Motshekga, uthi nakuba sinyukile isibalo sabaduduliwe, kodwa akukho ukwesaba kakhulu ngoba abanye abafundi kulaba abaduduliwe, benza kahle ekupheleni konyaka uma sekumenyezelwa imiphumela ka-matric.
Uthi abanye babo bayavela ngisho ohlwini lweziqengqe ngoba bayazimisela uma sebefunda umatikuletsheni.
Uphawule ngalokhu ngezibalo ezivezwe nguDkt Rufus Poliah, obhekelele izivivinyo kuzwelonke eMnyangweni wezeMfundo eyisiSekelo.
Ngenyanga ezayo njengoba kuqalwa ukubhalwa kwezivivinyo kubafundi bakamatikuletsheni, bawu-53 217 abaduduliwe besuka ku-52 961 wanyakenye.
Uthi ukududulwa kwabafundi kwaGrade 11 kuwumthetho obekiwe okufanele ulandelwe noma ngabe umfundi akakulungele ukudluliselwa kumatikuletsheni.
“Akufanele umfundi aphinde ibanga elilodwa kuze kube kathathu, kodwa-ke ngenxa yalezi zizathu zokuthi abanye babhekana nenkinga yokungadluleli phambili, kuyaphoqa ukuba badluliswe.
“Sinethemba lokuthi bazobhala, baphase,” esho.
Kuvezwe ukuthi isifundazwe KwaZulu-Natal, yisona esihamba phambili ngabafundi abaningi abaduduliwe. Kusona kuzobhala abafundi abawu-13 685 abadudulwe kwaGrade 11, kulandele iLimpompo ngabawu-10 230, kube yiGauteng yona nabawu-7 976 nezinye izifundazwe.
UDkt Poliah uthi okunye okusabanikeze inkinga kulo nyaka, wukwehla kwesibalo sabafundi abazobhala izifundo ezithile ezibalulekile. Uveze ukuthi iMaths Literacy basuke ku-460 708 bafinyelela ku-23 000, kwi-Pure Maths sehlile isibalo safika ku-271 297 sisuka ku-276 241.
Utshele abezindaba ukuthi nabafundi abenza iGeography kuzobhala abawu-355 432, besuka ku-377 075. Uthi kwiGeography isibalo sehle ngabafundi abawu-21 000.
“Sisaphenya ukuthi kungani sehle kakhulu kangaka isibalo kwiGeography nokwenyuka kwesibalo sabaduduliwe. KwiMaths siyazi ukuthi abanye abafundi bathi ayibasizi kwimpokophelo yabo.
“Kuyasikhathaza nokwenyuka kwesibalo sabaduduliwe ngoba kuphonsa inselelo yokuthi sibuyele emuva kwaGrade 11, sibhekisise izinkinga nakuba nakwamanye amazwe bedudulwa abafundi, kodwa kufanele silungise izinkinga,” esho. Uthi seluqaliwe uqeqesho kwabazogada ukubhalwa kwezivivinyo.