OWEMAGESI FC UTHI BAZOWADUMISELA NGEZULU AMAKILABHU AKWAZULU-NATAL
UGABE ngabadlali abanesipiliyoni uClinton Larsen ocija iMagesi FC ezovovana inkani neMaritzburg United koweMotsepe Foundation Championship (MFC) kusasa ngoLwesihlanu ngo-15h00, eSugar Ray Xulu Stadium, eClermont.
ULarsen ekhuluma neLANGA uveze ukuthi usethembe abadlali bakhe abanesipiliyoni ukuba balekelele le kilabhu ibuye namaphuzu agcwele.
Laba badlali abeke ithemba kubona ngu-Elvis Chipezeze, uMcedi Vandala amhlwithe kwiSummerfield Dynamos, nguDiamond Thopola noWonderboy Makhubu akholwa wukuthi bazokwazi ukwenza umsebenzi awudingayo.
Lo mqeqeshi waseThekwini uthe yize eke wasebenza kwiTeam of Choice kepha kalukho noluncane uzwelo azokuba nalo uma sebebhekene ngoLwesihlanu. Uthi umsebenzi wakhe umqoka ngaphezu kwazo zonke izinto.
Uthi uzimisele ngokuwadumisela ngezulu amakilabhu aKwaZuluNatal kwazise uma eseqedile ngeTe-am of Choice uzokavashela iMilford FC edonsa ngodizili emidlalweni yeligi.
IMilford isanda kugqashula ifindo lomshado nomqeqeshi wayo u-Asanda “Mhlekazi” Mvalo obesehlale kuyona iminyaka emine.
ULarsen uthi: “Ngiyazi ukuthi ngizobhekana nekilabhu enomlando onothile ebholeni lakuleli futhi engike ngasebenza kuyona. Wonke amakilabhu esigijima nawo azimisele ngokuthola ithikithi lokunyukela kwiDStv Premiership.
“Uma ubheka iBaroka FC, iMarumo Gallants neTeam of Choice kubukeka kuzokuba nzima ukunyukela phezulu ngoba wonke la maqembu azimisele ngendlela eyisimanga.
“Ngiyalithemba iqembu lami engiza nalo empini eThekwini. Njengamanje ngisalwa nomqondo wabadlali ukuze bakwazi ukubhekana nenselelo esemahlombe abo. Ngithokozile ngendlela esiqale ngayo isizini. Kuvunguza umoya ekhempini yami ngenxa yemiphumela emihle esisabuye nayo selokhu kuqale isizini,” kusho uLarsen.
* Kuzo ezeMFC, iBlack Leopards igcine ithathe isinqumo sokunika uPeter Mponda izintambo zokuhola le kilabhu. UMponda uzosizwa nguSolly Luvhengo oke wayibamba kuyona eminyakeni eyedlule. *
KUSASA NGOLWESIHLANU
ESolomon Mahlangu: Casric Stars vs Baroka FC 15h00.
EThohoyandou Stadium: Venda FC vs N.B. La Masia 15h00.
ESugar Ray Xulu: Maritzburg United vs Magesi FC 15h00.
ESoshanguve Stadium: Orbit College vs University of Pretoria 15h00.
NGOMGQIBELO
EThohoyandou Stadium: Black Leopards vs Upington City 15h00.
EGWK Stadium: Hungry Lions vs Platinum City Rovers 15h00.
ESoshanguve Stadium: JDR Stars vs Marumo Gallants 15h00.
ETUT Stadium: Pretoria Callies vs Milford FC 15h00.