BAKUBONA NJENGESIBUSISO UKUDLALA NEQEMBU LAKUBO
BAKUFANISA nesibusiso abadlali ababili beqembu lesizwe le-rugby lase-Italy njengoba bezobhekana emqhudelwaneni weNdebe yoMhlaba nezwe abazalelwe kulona.
I-Italy izobhekana neNew Zealand koka-Pool A koweNdebe yoMhlaba kusasa ngoLwesihlanu ngo-21h00 eFrance.
La mazwe atholana nje, iFrance iyona eqhwakele kuleli qoqo ngamaphuzu awu-13 emidlalweni emithathu, bese i-Italy ilala isibili ngamaphuzu awu-10 emidlalweni efanayo.
UToa Halafihi (osesithombeni) noHame Faiva abazalelwe eNew Zealand abadlalela i-Italy, bathi kufana nesibusiso kubona ukubhekana naleli lizwe.
Bobabili bake badlala kwiHurricanes yaseNew Zealand kwiSuper Rugby, kanti uFaiva udlalile ngisho esikwatini sikaU/20 seNew Zealand kumaJunior World Championships ngo-2013 nango-2014.
UFaiva uthe: “Ukwenza kweHaka kukunika umuzwa ojulile okungelula ukuwuchaza kwazise ngiyenzile ngidlala esikwatini sika-U/20 saseNew Zealand. Ukubhekana neHaka kusasa ngiphinde ngibhekane nabangani bami be-All Black kufana nesibusiso,’’ esho.
UHalafihi uthe: “SinoFaiva besilokhu sikhuluma ukuba siyenze iHaka sobabili nje kuphela.
“Uma sengibeka eceleni amancoko, lo mdlalo uza neminye imizwa engingazi ngingayichaza kanjani.
“Kodwa-ke sidlalela i-Italy manje simele yona kuzofanele sikwenze konke okusemandleni ukuwunqoba lo mdlalo.
“Ngeke kube lula ngoba basefomini kodwa sizolwa ukuze nathi sizame ukuwunqoba umdlalo,’’ kusho yena.
Khonamanjalo ukaputeni weqembu lesizwe le-rugby laseNamibia uJohan Deysel uhlawuliswe imidlalo emihlanu engazihlanganisi nalo mdlalo emuva kokuba ecishe wakhipha umphefumulo umdlali weFrance u-Antoine Dupont ezakhe ziguqiswa ngo96-0 yiFrance ngeledlule kokaPool A.
Ukhishwe ngekhadi elibomvu kulo mdlalo.
Izolo ngoLwesithathu ikomiti eliqondisa ubugwegwe liluhlalele udaba lwakhe labe selumshaya ngesibhaxu semidlalo emihlanu engasondelani nalo mdlalo.
Lokhu kuchaza ukuthi sekuphelile ngaye ngomqhudelwano wendebe yomhlaba.