'Zingaphezulu kuka-3000 izikole ezingalawuleki kuleli'
Lokhu kubandakanya udlame, ukukhulelwa kwabafundi, ukuhlukumeza nezidakamizwa
ZINGAPHEZULU kuka-3000 izikole ezingalawuleki kuleli. Lokhu kudalulwe nguNgqongqoshe weMfundo eyisiSekelo, uNkk Angie Motshekga, ngeSonto esithangamini nabezindaba ngombiko wakamuva othinta izikole zaseNingizimu Afrika.
UNkk Motshekga uthi izifundazwe ezihamba phambili ngesibalo sabafundi abangaphatheki yiKwaZulu-Natal, yi-Eastern Cape, yiWestern Cape neGauteng.
Uthi phakathi kwezinto eziyizinkomba zokungaphatheki kwalezi zikole, kubalwa udlame kubafundi, ukukhulelwa kwabo, ukuhlukumeza ngezindlela ezehlukene, nezidakamizwa.
Uveze ukuthi zonke lezi zinto ziphazamisa ukukhuliseka ngendlela enhle kwabafundi.
“Kubalulekile ukubambisana emphakathini.
“Siyabadinga abaholi bomdabu, abezenkolo nabantu abaneqhaza lokwakha ngesihle emphakathini.
“Nakuba ikhona imigomo ebekelwe abantwana ukuba baziphathe ngokulandela yona ezikoleni (code of conduct), kodwa ngeke ilandeleke yonke ngendlela esifisa ngayo uma singabambisene nabazali ekwakheni abantwana abanekusasa eliqhakazile, nabazophatheka ngenhlonipho ukuze baphumelele esikoleni,” co-ordinator. kusho uNkk Motshekga.
Unxuse ukuba umphakathi ubabonge othisha abasebenza ngokuzimisela emiphakathini njengoba uMfumfu (October) kuyinyanga yokubabungaza (othisha).
Uveze nokuthi mhla ka-5 kwephezulu, kuzogujwa uSuku loThisha ngomcimbi osezingeni likazwelonke eHeartfelt Arena, ePitoli, okulindeleke uMengameli wezwe uMnu Cyril Ramaphosa ukuba abeyingxenye yawo.
Utshele abezindaba ukuthi ukwesekwa kothisha kungaphansi kohlelo lomnyango olubizwa ngeTeachers Appreciation And Support (TASP).
“Othisha basebenza umsebenzi omuhle kakhulu.
“Okuncane nje okuyizipho okubhekiswe kothisha kule nyanga, kungabajabulisa kakhulu, babongwe ngomsebenzi abawenzayo bedlula ezimeni ezinzima,” esho.
Uthe njengoba kuqalwa ukubhalwa kwezivivinyo zabafundi bakamatikuletsheni mhla ka-30 kwephezulu, ucela abazali ukuba banikeze abafundi ithuba lokuzilungiselela.
Uthi uMnyango wezeMfundo, ukwenze konke okusemandleni.
“Izinhlaka zethu zokuqeqesha u-matric, zikwenzile konke okusemandleni azo.
“Osekusele wukuthi abazali banikeze abantwana isikhathi sokufunda esanele.”
Uthi bangaphezulu kuka-723000 abafundi abazobhala, ezikhungweni eziwu-6 800 ezweni lonke kanti izivivinyo zizophothulwa mhla ka-15 kuZibandlela (December).
UNkk Motshekga ubonge intsha ebiqashelwe ukusiza ezikoleni njengoba ziphelile izinkontileka zayo ngoMgqibelo.
Uthi imisebenzi yayo inconywe kakhulu ezikoleni ebitshalwe kuzona.