BUKHETHWE 'NGO-ELETHU' UBUHOLI BE-NFP KWAZULU-NATAL
BETHULWE nezethembiso ubuholi beNFP KwaZulu-Natal, obethulwe ngokusemthethweni izolo ngeSonto ngemuva kwengqungquthela ebiseNewcastle kusukela ngoMgqibelo.
Leli qembu liqale le ngqungquthela kunezinhlangothi ezimbili ezisembangweni wokulihola.
Kugcine kuphakanyiswe ngo-elethu uhlangothi oluholwa nguNkz Mbali Shinga, ongusihlalo, kulandela ukuhoxa ngemizuzu yokugcina kohlangothi lukaMnu Sibusiso Mkhabela, okunezinsolo eziqinile zokuthi yena nozakwabo bahoxiswe wukungavunywa yizinombolo zezithunywa ezihambisana nabo.
Ekhuluma naleli phephandaba uNkk Zodwa Mtshali, ongunobhala omusha weNFP esifundazweni, uthe ubuholi obuphakanyisiwe buthathe isinqumo sokuhamba ezinyathelweni zomsunguli waleli qembu, uNkk Zanele kaMagwaza-Msibi (ongasekho).
Uthe isifiso sabo wukukhulisa leli qembu, lisatshalaliswe ezingxenyeni eziningi zesifundazwe.
“Thina siwubuholi obusha obuqokiwe singena ezicathulweni zabanye abake bahola leli qembu.
“Sizimisele ngokuthi sisebenze ngokubambisana nazo zonke izinhlaka zeqembu, kusukela emazingeni aphansi kuze kuyofinyelela emazingeni aphezulu.
“Ukuhlala kwengqungquthela yesifundazwe kucacisa ngokusobala ukuthi akusekho ukubuyela emuva, ngoZibandlela (December) izohlala ingqungquthela yokukhetha ubuholi bukazwelonke.
“Lapha kasiphakanyiselwanga ukuzoxosha abantu ezikhundleni abajutshelwe kuzona yiqembu.
“Okunye esikwenzile, yisiqiniseko sokuthi kuphakanyiswa abantu abavela ezifundeni ezahlukahlukene.
“Sizogxila kakhulu kulesi sifundazwe ngoba iKZN yiyona eyisizinda seqembu okuhlanganisa nokusunguleka kwalo.
“Iqembu sizolifaka kuzona zonke izindawo esifundazweni ukuze senze umehluko,” kusho uNkk Mtshali.
...kasiphakanyiselwanga ukuzoxosha abantu ezikhundleni...