UKhuzani uvulele uQuality icala lokuzama ukubulala
Indaba isuswe wukubangwa kwegama elithi, iLembe
UPHUME esiteji esegadwe ngamaphoyisa qede wayovula icala lokuzama ukubulala, umculi kamasikandi uKhuzani “iNdlamlenze” Mpungose, ngenxa yezidubedube ezenzeke emcimbini kamasikandi eMnambithi ngoMgqibelo ebusuku.
Ngokuthola kweLANGA, kuthiwa uKhuzani ushaye uLawulani ‘Quality’ Biyela, odume ngokuchoma ngomswenko emabhinceni. Lokhu kubangelwe ukungaboni ngaso linye phakathi kwabo.
Ngokwe-video esabalele ezinkundleni zokuxhumana, uKhuzani ushaye uQuality ngenqindi eseyongena esiteji, okuholele ekutheni kuqhume izibhamu ngesikhathi kunandisa uKhuzani kwaze kwaphoqeleka ukuba kufonelwe amaphoyisa ukuba ayomvikela.
Okususe ingxabano phakathi kwabo, wukubangwa kwegama elithi “iLembe”. Kwenzeka lokhu nje, uKhuzani ngeledlule uhlonishwe ngesihlangu nomkhonto ohambisana nebhande elibhalwe ukuthi iLembe, ngomhla ka-24 kuMandulo (September) emcimbini uMbuso Wamaciko Masikandi Festival, eCurries Fountain, eThekwini.
Uhlonishwe abahleli bomcimbi bethi bamfanisa neLembe emculweni kamasikandi ngokulwela ukuphakama kwalo mculo.
UQuality uzwakalise ukungathokozi ezinkundleni zakhe zokuxhumana, wabhala ukuthi nguyena iLembe, laba abanye bangamaleb...(inhlamba). UKhuzani uthi ucasulwe wukuthi uQuality uphinde wambiza ngale nhlamba emakhaleni behlangana kuwona lo mcimbi.
“Ngesikhathi ngibizwa ukuthi ngiyongena esiteji sekuyisikhathi sami sokucula, kuqale imbongi yami yangihaya isikhathi eside esiteji, ifaka zona izihasho zami zokuthi ngiyiLembe komasikandi.
“UQuality usuke phansi endaweni yezicukuthwane lapho ebehlezi khona wazongivimba endleleni, engikhomba ngomunwe ekhuluma amagama amabi ethi ngiyileb... ngizofa uma ngiqhubeka nalento engiyenzayo, kungani ngizibiza ngeLembe.
“Ukungiphazamisa kwakhe nabanye abehamba nabo bekuyinto abeyihlelile ngoba ne-video yesigameko nguyena oyiqophe wayisabalalisa kuqala, yavela ngaye kuTiktok. Okusho ukuthi ubehlose ukungixaphaza kubuka izwe ngokuthi atshale amakhamera uma esengiphazamisa,” esho.
Utshele leli
ukuthi emuva kwesigameko, nemoto yakhe yohlobo lweHyundai H1 iqhunyiswe amasondo, nezibhamu zidla lubi.
“Lo muntu ubhale nasezinhlakeni zokuxhumana, wathi umculo ufuna ukuwulawula njengaserenke. Akekho ongazi ukuthi erenke kubulawa abantu,” esho.
UQuality utshele ILANGA ukuthi leli gama waziqalela yena njengoba sebemqhwaga lona. Uphikile ukuthi ubevimba uKhuzani, waze washaywa ngenxa yalokho.
“Ngilandwe enye insizwa yathi uKhuzani uthe ucela ukufakwa yimina esiteji. Ngayitshela ukuthi sesidlulile esami isikhathi sokusebenza esiteji. Le nsizwa ithe asiye kuKhuzani ufuna ukungibona-ke. Ayikho ingxabano eyenzekile emcimbini,” kusho uQuality.
Uthi laba baculi uKhuzani neGcokama, balandela emuva kwakhe kuleli gama. Uthe ngesikhathi eziqamba ngalo, uthole imibuzo eminingi ivela eNdlunkulu kaZulu, ebuzwa ngesizathu sokuzibiza ngeLembe. Uthi laba baculi basebenzisa udumo lwabo ukudla amandla akhe.
Okhulumela amaphoyisa KwaZulu-Natal, uCol Robert Netshiunda uthi amaphoyisa aseMnambithi aphenya icala lokuzama ukubulala kulandela isigameko somsolwa odubule kaningi emoyeni. Uthi kubikwe nokuthi umsolwa ubhala izinkulumo zokusabisa ezinkundleni zokuxhumana.