UHUNT UDINWA YIMITHETHO YE-CAF EMJIKIJELE EZIHLWELENI
UCASULWA wumthetho omusha weCaf okuyinhlangano eyengamele ibhola e-Afrika, uGavin Hunt (osesithombeni) ongumqeqeshi weSuperSport United njengoba ethi kawuwenzi umqondo.
ISuperSport idlulele esigabeni samaqoqo emuva kokuba iguqise iGaborone United yaseBotswana ngo-3-0 koweCaf Confederation Cup ngoLwesihlanu ebusuku eLoftus Stadium, ePitoli. Amagoli eSuperSport ashaywe nguGodspower Ighodaro.
Kube wu-4-1 sekuhlanganiswe yomibili imilenze.
UHunt ubukele ezakhe ehleli ezihlweleni kwazise iCaf iqhamuke nomthetho othi umqeqeshi ongenayo iCaf A License noma iPro License, akavunyelwe ukuhlala ebhentshini.
UHunt une-Uefa A License. Ekhuluma nabezindaba emuva komdlalo, uwuhlabe wawuhlikiza lo mthetho, wathi kawuwenzi umqondo.
“Iyacasula le nto. Sengihlale iminyaka ewu-25 ebhentshini ngilolonga emidlalweni yeCaf, gwiqiqi kangisavunyelwe.
“Kangiqondi ukuthi yini le eyenziwa yiCaf, iyadumaza. Nokho kuzofanele ngizame ukuyilungisa iLicense yami ngoLwezi (November) sizobona.
“Kangazi ngempela ukuthi yini le esishintshile. Sengihlale iminyaka ebhentshini ngadlala kuma-semi final nakuma-quarter final eCaf Champions League ngikwiKaizer Chiefs eminyakeni emibili edlule.
“NakwiWits nayo iSuperSport ngihlalile ebhentshini ngadlala esigabeni samaqoqo, ibingekho inkinga. Mina kangiwuboni nje umqondo ophusile kule nto. Kangazi noma uma unoCaf C License uvumelekile yini ukuhlala ebhentshini.
“Ngicabanga ukuthi amadodakazi ami anoCaf C kodwa kawakaze alidlale ibhola kodwa wona mhlawumbe angahlala ebhentshini kwazi bani,” kusho uHunt ebhuqa.
Nokho uthi uyajabula ukuthi ezakhe zidlulele esigabeni samaqoqo yize isimo sinjena.