Kusolwa izinkinga zeSABC ngokungaholi kwezisebenzi zoZalo
'Ngeke sibuyele emsebenzini ingakangeni imali yethu'
KUME nse ukuqopha, ngenkathi abalingisi nabadidiyeli bomdlalo owuchungechunge Uzalo, beduba ukusebenza, bekhala ngokungayitholi imiholo yabo ngesikhathi, kusukela ngoMsombuluko.
ILANGA lihabule lezi zindaba ngemithombo yalo engaphakathi kulo mdlalo okhonjiswa kwiSABC 1, phakathi nezinsuku. Ngokusho komthombo waleli phephandaba, ukungaholi ngesikhathi kwabalingisi nezinye izisebenzi sekuphenduke insakavukela umchilo wesidwaba, njengoba bengasalwazi usuku oluqondile lokuhola. “Sasivumelene ngomhla ka-25, kodwa manje kasisalwazi usuku oluqondile, sesiholelwa ngezinsuku ezahlukene, nokwenza singazi ukuthi sizozimisa kanjani izikweletu kuma-akhawunti ethu,” kusho lo mthombo.
Uthi kulokhu batshelwe ukuthi bazohola ngomhla ka-30 uma kuphela inyanga. “NgoMsombuluko sigcine simisa ukuqopha njengoba besingazi ukuthi kwenzekani ngemiholo yethu.” Uqhube wathi ngoLwesibili nangoLwesithathu (izolo) bakhona ababuyelile emsebenzini, emuva kokuholelwa kanti abanye bebesancela izithupha.
“Thina esingaholile sigcine ngoMsombuluko, ngeke sibuyele emsebenzini kuze kube iyangena imali yethu.” Omunye umlingisi walo mdlalo oqoshwa yinkampani iStained Glass Productions, ocele ukungadalulwa, uyiqinisekisile eyokungaholelwa ngesikhathi. “Mina ngihole ngoLwesibili kusihlwa. Kusenabanye ozakwethu abangakaholi ngezizathu esingazazi nathi,” kusho yena. Lo mlingisi uveze ukuthi njalo uma sekusondele ukuphela kwesizini kulo mdlalo, izinto ziba mapeketwane, kusuke sekubanjwa kuyekwa, kutatazelwa, nesikhathi sokuqeda ukuqopha sesizophela.
“Ngikhuluma nawe nje, bekumele siqede ekupheleni kwale nyanga ukuqopha le sizini kodwa sesengezelwe inyanga ezayo ngenxa yokuthi sisemuva ngokomsebenzi wokuqopha.”
ILANGA lizamile ukuxhumana nomunye wabalingisi okuvele ukuthi udube ukuqopha ngenxa yokungaholi, kodwa wala ukuphawula.
Wenqabile nokuqinisekisa ukuthi useholile noma akakaholi njengoba evale ucingo intatheli isazama ukuchaza ngodaba elwenzayo.
Okhulumela iStained Glass Productions, uNomfundo Zondi, uthe ngeke akwazi ukuphawula mayelana nokuhola kwabalingisi nezisebenzi ngenxa yokuthi ubesalinde ukuthola iminingwane egcwele ngalokhu.
Utshele leli phephandaba ukuthi izinkontileka zabalingisi ziphela ekupheleni kwale nyanga uMfumfu (October), nokuthi zizoqala maduze izingxoxo zokuvuselelwa kwezinkontoleka ezintsha nokuqala kokuqoshwa kwesizini entsha.
Isizini ekhonjiswayo kulindeleke ukuba igcine ukubonakala emoyeni ngoNhlolanja (February) wonyaka ozayo.
I-SABC ithunyelelwe imibuzo nge-email kodwa kuze kwashaya isikhathi sokuloba ingaphendulile.
Sekuyindaba egudwini ukuthi le nkampani kahulumeni yezokusakaza ibhekene nezinkinga zemali njengoba kusanda kuvela imibiko ethi ingase inxenxe uhulumeni ukuba uphinde uyitakule.
Umthombo waleli phaphandaba ongaphakathi kwiSABC uthe indaba yokungaholelwa ngokugcwele kwezinkampani eziqopha ngaphansi kwayo isijwayelekile, kanti lokhu kugcina sekukapakela nakubalingisi.