'Lisekubhaceni' ikhansela elasinda kubulawa uzakwabo
'Ngasindiswa wukuthi ngikhokhe esami isibhamu, ngidubule ngibhekise ngakubona'
LISETHUKA izanya ikhansela le-IFP, elisinde lihlaselwa nomngani walo, uMnu Mzwandile Shandu, oshonele endaweni yesigameko, obeyikhansela lakuwadi 7, ngaphansi koMasipala waseMkhambathini, esigamekweni esenzeke emasontweni amabili adlule.
UMnu Menzi Mkhize (47) ubenengxoxo naleli phephandaba lapho eveze ukuthi wasindiswa wukudonsa esakhe isibhamu, wasibhekisa kubabulali.
Uthe ubenobudlelwano obuhle nomufi, bekubeke eceleni ukwehlukana ngokwamaqembu ezombusazwe.
Uqhuba uthi ngosuku abahlaselwa ngalo, yena nomufi babenohambo oluya eMgungundlovu.
“UShandu ubehlala ezindaweni ezehlukene ngoba ebalekela ababulali abebefuna ukuqeda ngempilo yakhe.
“Mina ngisuke eMkhambathini ngizohlangana naye ngoba kunezinto obekufanele sizilungise.
“Bekufanele silibangise eMgungundlovu, kodwa sizoqala ngokuthatha okuthile eMlazi.
“Ngezwa ukuqhuma kwesibhamu okwathi kusenjalo ngabona uShandu ephelelwa ngamandla eshayela.
“Wazama ukuyiqhuba imoto esebenzisa isandla njengoba waseyedubulekile onyaweni.
“Bazama ukuphuma nomfowabo. Nami ngaphuma emotweni sengivele ngidubulekile ethangeni nasesandleni sokudla.
“Nakuba ngasengidubulekile, kodwa ngababona ababulali, ngasindiswa wukuthi ngikhokhe esami isibhamu, ngidubule ngibhekise ngakubona.
“UShandu bamqedela ngoba esengaphandle. Wabulawelwa kulo muzi imoto yakhe eyaphaphalazela kuwona.
“Kumanje ngisekubhaceni. Angikwazi ukwenza lutho njengoba ngesabela impilo yami.
“Okungizwisa ubuhlungu wukuthi kuze kube yimanje akukho muntu kubaphathi bomkhandlu oseke wangihlola ngokwesimo sami, ngaphandle kwamakhansela amabili ake angifonela ebuza impilo.
“Ngiyaludinga usizo ukuqiniselwa ukuphepha kwami,” kusho uMkhize.
ILANGA lixhumane noMnu Nhlakanipho Ntombela, oyimeya yaseMkhambathini, oveze ukuthi udaba lukaMkhize lusezithebeni zomkhandlu.
Uthe akulona iqiniso ukuthi akukho noyedwa wabaholi bomkhandlu oxhumana noMkhize selokhu athola ukulimala.
“Ngigcina ukuxhumana naye (uMkhize) ungitshele ukuthi usekhaya, usalindele ukuthi elulame kahle bese ebuyela emsebenzini.
“Maqondana nokuqiniswa kwezinhlelo zezokuphepha, ngeke kube yinkinga ukuthi kwenziwe lokho uma kuwudaba olubikwe kahle kusomlomo.
“Nguyena usomlomo okufanele athathe isinqumo ngoMkhize. Sizohlangana silubhunge udaba lwakhe,” kusho uMnu Ntombela.
Okhulumela amaphoyisa KwaZulu-Natal uLt-Colonel Robert Netshiunda uthe amaphoyisa aphenya icala lokubulala, namabili okuzama ukubulala kanti bekungakaboshwa muntu.