LIYENYUKA IZINGA LOKUQHUNYISWA KWEMISHINI YEMALI
LIKHUPHUKE ngamaphesenti alinganiselwa kwawu-20 izinga lokuqhunyiswa kwemishini ekhipha imali (ATM’s), ngokusho kwabeSouth African Banking Risk Information Centre (Sabric).
Kule minyaka edlule kuqhunyiswe imishini ewu-178, ngo-2020 ibewu-214, ngo-2021 yabawu-271.
Umbiko uveze ukuthi iziqhumane eziningi ezisetshenziswayo zisuke zithathwe eZimbabwe. Izigebengu lezi eziqhumisa imishini, kuthiwa kazigcini nje ngayo, ziphinde zihlasele nezimoto ezithutha imali, ziqhumise zona.
Lo mbiko ufakazelwe yisigameko esenzeke izolo ngoLwesithathu kusabalala ama-video amalungu omphakathi kwaMashu ecosha imali ebisaphazeke phansi ngemuva kokuqhunyiswa kwemoto yemali qede yathungelwa ngomlilo.
Lezi ziqhumisi kuthiwa kuphinde kusetshenziswe zona kulabo abaqhumisa ezimayini ezingekho emthethweni. Kuvela ukuthi lezi zigilamkhuba kujwayeleke ukuthi ziphathe izinhlokohlela zezibhamu, nokuholela ekutheni zigcine zidubulana namaphoyisa nonogada ukuze zikwazi ukuthola le mali ezisuke ziyifuna.
Ngokusho kwabakwaSabric, laba baziwa ngokuthi ngisho abantu ababona bengaba ngofakazi, bayabadubula.
Kuvela ukuthi lezi zigilamkhuba zikwazi ukuqhumisa ingaphakathi lale mishini, okusho ukuthi ziyakwazi ukuhamba nemali.
Le nhlangano ithi ingaphezulu kuka-R32 million imali etholwe yizigebengu ngonyaka odlule. Laba bathi enye yemali ethathwe yilezi zigebengu kayisebenziseki njengoba igcine ichithekelwa wu-ink kodwa ziyithathe injalo.
Kuthiwa ngonyaka odlule imishini eminingi iqhunyiswe eGauteng njengoba kuqhunyiswe ewu-228, eNorth West khona kuqhunyiswe ewu-48.