Ingwazi kayikuboni okungaphazamisa amaBhokobhoko
Kuminciwe kuleli ngomphumela we-Ireland neScotland
AKABONI kukhona okungama endleleni yamaBhokobhoko ebheke kuma-quarter final eNdebe yoMhlaba ye-IRB eqhubeka eFrance u-Odwa Ndungane owayengumdlali waleli qembu lesizwe lebhola lombhoxo lakuleli.
Le ngwazi eyayikhona ngenkathi AmaBhokobhoko ekhishwa yiNew Zealand ngo-22-18 kwiNdebe yoMhlaba eyayise-England ngo-2015, ithi kayibuboni ubungozi obungase benziwe yiScotland ezogadulisana ne-Ireland kowokugcina kaPool B ngoMgqibelo ngo-21h00.
Ekhuluma neLANGA ngaphambi kwalo mdlalo u-Odwa, ubeke izizathu ezingenza lo mdlalo uvune elakuleli.
“Ngikholwa wukuthi womabili la maqembu azokuya kulo mdlalo ekwazi okumele akwenze.
“Womabili asedlale ndawonye izikhathi eziningana.
“I-Ireland isiyehlule amahlandla amaningana iScotland.
“Kakukwazi ukuthi abantu owagcina ukubehlula ngo-2017 ungaqhamuka usuzobakhipha kalula kwiNdebe yoMhlaba.
“Ngiyazi emdlalweni ofana nalona kusuke kungenzeka noma yini.
“Ukuze iScotland inqobe, kuzodingeka ithole amaphuzu awu-21 bese womabili amaqembu ashaye ama-try amane.
“Lokhu kungabeka iScotland phezulu bese i-Ireland ilala isibili okuyikhona okungasikhipha kulo mqhudelwano, ngenxa yokuthi i-Ireland yasehlula emdlalweni wethu.
“Lokhu kubukeka kungaba wumqansa ukuthi kwenzeke.
“Ngicabanga ukuthi thina (amaBhokobhoko) sesiwenzile umsebenzi wethu.
“Uma ubheka womabili la maqembu, uyabona ukuthi abafana baka-Andy Farrell (ongumqeqeshi we-Ireland) banabadlali abawu-23 abaqinile, kuhlanganisa nalabo abazobe besebhentshini,” esho.
Ngenkathi ILANGA limbuza ukuthi ngeke yini lawa mazwe angomakhelwane alixhophe elakuleli, uthe: “Umdlalo webhola lombhoxo kawunakho lokho.
“Womabili amaqembu azongena enkundleni ngenhloso yokunqoba.
“Thina sesilinde ukuthi sizobhekana nobani kowomkhumulajezi, okubukeka kungase kube yiFrance uma i-Ireland igcina inqoba.
“Uma udlala kulesi sigaba, kufanele uhlale ukulindele ukubhekana nanoma yiliphi iqembu.”
Ebuzwa ngamaqembu amane angase aphakamise le nkomishi, ubale AmaBhokobhoko, i-All Blacks yaseNew Zealand, i-England neFrance engosokhaya.
* Isiyonke imidlalo yeNdebe yoMhlaba yebhola lombhoxo ihlelwe kanje:NAMUHLA NGOLWESINE
New Zealand vs Uruguay 21h00.
KUSASA NGOLWESIHLANU
France vs Italy 21h00.
NGOMGQIBELO
Wales vs Georgia 15h00. England vs Samoa 17h45. Ireland vs Scotland 21h00. NGESONTO
Japan vs Argentina 13h00. Tonga vs Romania 17h45. Fiji vs Portugal 21h00.