ISILOMO SEMADRID SIFANISWE NOSHAKESPEAR NGOBUCHULE

UMDLALI osemncane weReal Madrid yaseSpain, uJude Bellingham (osesithombeni) ufaniswe noqweqwe lombhali wezincwadi zase-England, uWilliam Shakespeare ngenkathi eziqophela umlando ngokushaya amagoli ayishumi emidlalweni ewu-10 yale kilabhu.

IMadrid ibhabhadise i-Osasuna ngo-4-0 koweSpanish La Liga ngoMgqibelo. UBellingham uhambe ezinyathelweni zikaCristiano “CR7” Ronaldo owayengumdlali weMadrid owakwazi ukushaya amagoli ayishumi emidlalweni ewu-10 ilandelana yale kilabhu.

UBellingham ugila lezi zimanga nje, udlala esiswini kule kilabhu afike kuyona esuka kwiBorussia Dortmund yaseGermany.

NakwiBorussia ubegila izimanga okumenze waphelela eSantiago Bernabeu okuyikhaya leMadrid edume umhlaba wonke ngokuhlala inabadlali abaseqophelweni eliphezulu.

Phela yaziwa ngokuba ngomacaphuna kusale njengoba ingesabi ukufaka isandla ekhukhwini uma kumele kuthengwe abadlali bezinga eliphezulu.

IMadrid ibhale ekhasini layo ichaza lo mdlali njengofana nse noShakespeare odume umhlaba wonke ngobuchule bokudlala ngosiba.

Lo mdlali olihlikihla enkabeni yenkundla, usephenduke umsindisi wale kilabhu njengoba eyishayela amagoli amqoka.

Kuzokhumbuleka ukuthi iMadrid ishiywe ngumgadli wayo obehamba phambili uKarim Benzema waseFrance ngokuphela kwesizini edlule.

Nokho ukusebenza ngobuchule kukaCarlo Ancelotti ongumqeqeshi weMadrid, yikhona okwenza izinto zibe lula kulo mdlali oneminyaka ewu-20 ubudala. IMadrid ebukeka ibuyelwa yifomu eyaziwa ngayo, ngeledlule ithele othulini izinkunzi zase-Italy, iNapoli kowe-Uefa Champions League.