UMGADLI UBONGA UMLOLONGI OWAXOSHWA NGOKUMSAYINISA KWIMILFORD FC
UFUNA ukusiza iMilford FC izinze kwiMotsepe Foundation Championship (MFC) uSiphosethu Ndlabi (24) (osesithombeni), ongumgadli wale kilabhu enqobe umdlalo wayo wokuqala kule sizini, ihlula iCasric Stars ngo-2-0 ngoMgqibelo ntambama eSolomon Mahlangu Stadium, eMpumalanga.
IMilford FC iqede lo mdlalo ingasaphelele kukhishwa ngekhadi elibomvu uMjabulise Mkhize.
Amagoli eMilford ashaywe nguNdlabi noJabulile Gxokoshe. Izinto seziqala ukujika kwiMilford njengoba phakathi nesonto ibambane neMagesi FC ngo-1-1 KwaMashu, obekuyiphuzu layo lokuqala kule sizini.
UNdlabi uthi nakuba iphupho lakhe elikhulu kuwukudlala kwiDStv Premiership ngelinye ilanga, kepha okwamanje umqondo wakhe uwugxilise ekusizeni iMilford FC izinze kwiMFC.
Uthi ufisa ukusonga isizini eseqobele amagoli awu-10.
“Ngibonga abaphathi bekilabhu nomqeqeshi osanda kuhamba (u-Asanda Mvalo) owanginika ithuba lokuba yingxenye yekilabhu kusukela ngesizini edlule.
“Emdlalweni wethu neCasric sithwale kanzima kwazise isimo sezulu besishisa kakhulu, kungadlaleki.
“Ngibonga ukuthi sikwazile ukubuya namaphuzu agcwele kulo mdlalo. Ngikholwa wukuthi indlela esayihlelela ngayo le sizini isiyabonakala ngoba bonke abadlali baqatha ngokwanele ukumelana nazo zonke izimo ezifikayo enkundleni,” esho.
UNdlabi wake wadlalela iMavuka FC yaseKokstad okuyilapho atholwa khona nguMvalo.
Isiyonke imiphumela yeMFC ebingempelasonto ihambe kanje:Venda 0, Baroka 1; Tuks 1, Leopards 0; Casric 0. Milford 2; Orbit 3, Gallants 2; Magesi 2, JDR 3; Platinum 0,
PMB 1; Upington 1,