UMNDENI WOWASHA EBHILIDINI EGOLI UKHALA NGEZINKULUMO
UKHALA ngezinkulumo ebezilokhu ziqhamuka usalinde ukungcwaba umndeni kaNkz Bongiwe Nkomo obalwa nabawu-77, abashona ngesikhathi kusha ibhilidi ngenyanga edlule, eGoli.
Umphumela wolibofuzo wesidumbu sikaNkz Nkomo uphumile ngoMsombuluko ngemuva kokuba umndeni uphoqeleke ukuhlala inyanga emakhandleleni ulinde ukungcwaba.
UNkz Nkomo waseNhlonga, eMsinga umndeni wakhe wawukwazile ukumhlonza kodwa izikhulu zikahulumeni zanxusa ukuba kwenziwe ulibofuzo ukuze kube nesiqiniseko sokuthi kungcwatshwa okunguyena ngempela.
Ekhuluma neLANGA uMnu Mluleki Nkomo ongumfowabo kaNkz Nkomo, uthe nakuba lokhu sekuzokwehlisa umthwalo, kodwa akubanga yisikhathi esilula ukulinda njengoba bekulokhu kunezinkulumo ezingezinhle ebeziqhamuka kubantu.
“Bekunzima sisalindile futhi sihleli emakhandleleni. Obekusihlukumeza kakhulu yizinkulumo ebezilokhu ziqhamuka mayelana nabantu abashona kuleli bhilidi,” esho.
Uthe ziningi izinkulumo ebezingehli kahle ebezikhulunywa ngabantu, ezinye zazo zicishe zawuhlukanisa phakathi umndeni. Utshele leli phephandaba ukuthi bekunabanye abebenezinsolo zokuthi akashonanga udadewethu kulo mlilo, besola izinto zesintu nokuganga kwabantu.
“Lokhu bekungasiphathi kahle ikakhulukazi umama omncane (ozala uBongiwe) nobaba njengoba yena selokhu agcina emsebenzini ngemuva kwesigameko.
“Ubaba uhlukumezeke kakhulu, nasemsebenzini washo ukuthi ngeke akwazi ukubuyela engayifihlile indodakazi yakhe,” esho.
Uthe bewumndeni banethemba lokuthi umthwalo usuzokwehla uma sebazi ukuthi nangu udadewabo futhi umzimba wakhe uthunwe kuphi.
Inkonzo yomngcwabo kaNkz Nkomo ihlelelwe uMgqibelo esiya kuwo, eNhlonga, eMabomvini, eMsinga.
ILANGA lithole ukuthi kusenezidumbu ezingakangcwatshwa njengoba kusalindwe ulibofuzo, yize sezikhona ezinye esezingcwatshiwe.