Abonge ukwesekwa amakhansela e-IFP abexoshiwe eMvoti
ABONGE ukwesekwa yiqembu lawo namalungu omphakathi amakhansela e-IFP, avunwe yinkantolo eNkulu yaseMgungundlovu maqondana nokuxoshwa nokuvalwa kwemiholo yawo kuMasipala waseMvoti, eGreytown.
Amakhansela ayisishiyagalolunye abesexoshiwe ngoba esolwa ngokungayihloniphi imithetho elawula ukusebenza kwawo.
Abesolwa ngokungayihambeli imihlangano, yaze yaba mine.
Lo mkhandlu ubunjwe ngamaqembu ezombusazwe ahlukahlukene okubalwa kuwona i-ABC eholwa nguMnu Philani Mavundla, ophinde abe yimeya.
Uphethe lesi sikhundla ngokubambisana ne-ANC namanye amaqembu.
Amakhansela eNkatha awu-8 nelilodwa le-ABC, anikwa izincwadi zokuxoshwa kwawo ngenyanga edlule.
Isinqumo sokuxoshwa kwawo sathathwa yiziphathimandla zalo mkhandlu ngemuva kokuba zithole iseluleko esigunyaza ukuba kuthathwe lesi sinyathelo emnyangweni wezokuBusa ngokuBambisana nezoMdabu KwaZulu-Natal.
NgoLwesibili lawa makhansela e-IFP abebize isithangami sabezindaba, lapho ethe kakulona iqiniso ukuthi ahlala angaya emihlanganweni yomkhandlu.
Kubuye kwabanjwa umkhuleko wokuthula nokubuyisana kulo masipala.
Ethula inkulumo yakhe, uMnu Petros Ngubane ongelinye lalawa makhansela futhi oyimeya yoMasipala wesiFunda uMzinyathi, uthe baqoke ukubiza amalungu eqembu labo, bezowabonga ngemikhuleko yawo.
“Sifisa ukubonga kubantu bemikhakha eyehlukene ngokubambisana nathi ngezikhathi zobunzima.
“Sixoshelwe into engekho, kuthiwa salova emhlanganweni.
“Ngosuku okuthiwa saphuma saduba umhlangano ngalo, sasingahambi kodwa sasiyoxoxa. Kusemthethweni ukuthi iqembu liphume liyobhunga ngaphandle uma kunezinqumo okusuke kufanele zithathwe.
“Kumanje sibungaza ukunqoba ngoba siyakholwa wukuthi nangosuku okuzobuyela ngalo udaba enkantolo, sizofike sinqobe ngoba sifike sachaza ukuthi kungani singafikanga komunye wemihlangano eyayibizwe ngabathile.
“Inkinga kwaba wukuthi sasingekho nesisodwa isizathu esizwakalayo maqondana nomhlangano esibizelwa kuwona.
“Ngiyafisa ukusho ukuthi thina kasinankinga nokuphatha umkhandlu sisebenzisana ne-ABC, inqobo nje uma izokwazi ukuhlangabezana nezidingo zomphakathi, ngoba injongo yethu wukuba kusizakale abantu ngentuthuko.
“Khona kubuhlungu ukuthi kunabantu abasemkhankasweni wokufafaza izinto ezingelona iqiniso ngamakhansela e-IFP, kuthiwa kawafuni ukusebenzela umphakathi.
“Singakwenza kanjani lokho ngoba ziyabonakala izithelo ezindaweni esiphethe kuzona?
“Mina nje ngiyimeya eMzinyathi, akukho okunginyakazisayo kulesi sikhundla ezinhlelweni zokuhambisa intuthuko,” kusho uNgubane.