ININGIZIMU AFRIKA IPHIKA EYOKWESEKA I-HAMAS YASE-PALESTINE
UHULUMENI waseNingizimu Afrika osegaxele endabeni yempi ephakathi kwe-Israel nePalestine, uyaphika ukuthi weseka iHamas, okuyiqembu lasePalestine eliphethe iGaza.
Umsindo mayelana nokukhonjwa ngenjumbane kukahulumeni wakuleli, uqubuke emuva kokusabalala kwemibiko yokuthi uDkt Naledi Pandor (osesithombeni) onguNgqongqoshe wezobuDlelwano bamaZwe nokuBambisana, ushayelane ucingo nomholi weHamas, ngenhloso yokuzwakalisa ukweseka iHamas okuyiyona eqale yahlasela kwa-Israel ngoMgqibelo ziwu-7 kwephezulu.
I-SA Jewish Board of Deputies, yexwayise uhulumeni ngokuthi uma eseka iHamas, uzofaka izwe obishini.
“Ngokusho kweHamas, uPandor uzwakalise ukweseka ukuhlasela kwayo (iHamas) kungazelelwe kwa-Israel, lapho ibulale abantu khona, yaphinde yathumba izakhamizi.
“UNgqongqoshe uPandor usekhethe uhlangothi empini. Usexhumane ne-Islamic Jihad, kanti ngokwenza kanjalo usefake izwe lethu ‘esi-mweni esibucayi’,” kusho iSA Jewish Board of Deputies.
Emuva kwalesi sitatimende, umnyango kaDkt Pandor uphumele obala, wathi akulona iqiniso lokhu okushiwoyo.
Ngokusho kwawo umnyango, uDkt Pandor unxuswe ukuba ashayele ucingo uMholi weHamas u-Ismail Haniyeh, badingide ngokuthunyelwa kosizo lokwelekelela abantu basePalestine.
Uthi-ke umnyango kuthe bephakathi nengxoxo uDkt Pandor wabe esezwakalisa ukuthi iNingizimu Afrika iyazwelana futhi iyabeseka abantu basePalestine. Uphinde wazwakalisa ukudabuka ngokubhubha kwabantu abangenacala ePalestine.
Esitatimendeni sawo umnyango uqhuba uthi uDkt Pandor nomholi weHamas baqhubekile badingida ukuthi luzothunyelwa kanjani usizo eGaza nakwezinye izindawo ePalestine.
Lo mnyango kaDkt Pandor uthi le mibiko esisabalele iwumzamo wokubheca ungqongqoshe nohulumeni wakuleli.
Ugcizelele ukuthi ukuxhumana kukaDkt Pandor nomholi weHamas kuhambisana nokulungela kweNingizimu Afrika ukuxoxisana nazo zonke izinhlangothi ezithinteka kule mpi ngenhloso yokugqugquzela ukuqeda ukungqubuzana okuqhubekayo.
UMnu Vincent Magwenya okhulumela uMengameli wezwe uMnu Cyril Ramaphosa naye uthi ingamampunge imibiko yokuthi uhulumeni waseNingizimu Afrika uzwakalise ukweseka iHamas. Uthi iNingizimu Afrika ayinabo ubudlelwano neHamas, kodwa inobudlelwane nePalestine.
Uqhube wathu ukweseka iPalestine ukuchazi ukweseka iHamas.