KUZOCWANINGWA NGOKUFA KOFISHI EMZINGAZI
KUJUTSHWE inkampani ezimele ezocwaninga ngembangela yokufa kofishi emfuleni uMzingazi, eRichards Bay, okunezinsolo eziqinile zokuthi babulawe wukungcola kwamanzi okudaleke kucishwa umlilo oqubuke enkampanini yezingodo, okwenzeke emasontweni adlule.
Kusolwa ukuthi ofishi abahlala kulo mfula oxhuma olwandle, babhekane nenkinga yokungakwazi ukuphefumula ngenxa yokungenelwa ngamanzi anensizi yomlotha.
Lesi simo sishiye abantu bekhala, ikakhulukazi labo abaziphilisa ngokudoba ofishi kulo mfula.
Abakhulume naleli phephandaba, baveze ukuthi badoba kulo mfula maqede bayothengisa. Abanye badoba bondle imindeni yabo.
UMnu Muzi Biyela oyilungu lomphakathi eliziphilisa ngokudoba kulo mfula, uthe bakhathazekile selokhu kutholakale ukuthi ofishi bayafa emfuleni.
“Ngineminyaka engaphezulu kweshumi nesihlanu ngidoba kulo mfula. Ngiyabakhipha ofishi ngithengisele abantu emphakathini wangakithi.
“Akukho lapho engisebenza khona ngaphandle kokuthi ngivuka ekuseni ngiyodoba ukuze ngibhekane nezidingo zomuzi njengendoda.
“Sekuzofanele sizame ukuyobheka ofishi kwezinye izindawo ngoba lapha sekunzima,” kusho uMnu Biyela.
ILANGA likhulume noMnu Danny Knoesen (osesithombeni) oyimenenja ye-NCT Forestry Agricultural Co-Operative Limited. Ubonge ukubambisana ngokuhlanganyela kwezinhlaka eza-hlukene kucinywa umlilo.
Uthi inkampani yakhe ithathe isinqumo sokuqasha iGround Truth, okuyinkampani ezokwenza ucwaningo ngembangela yokufa kofishi.
Uthe uzwe ubuhlungu uma ethola umbiko wokuthi sekufe ofishi emfuleni, futhi kusolakala ukuthi babulawe wukungcola kwamanzi ngenxa yensizi.
“Besijabulela ukunqotshwa komlilo obusihlasele. Kuthe kusenjalo, ngoMgqibelo sabikelwa ukuthi bayafa ofishi emfuleni.
“Okusizwisa ubuhlungu wukuthi kunabantu abaziphilisa ngokudoba kulo mfula.
“Okwamanje ngeke sikhulume into eqondile ngembangela yokufa kwabo, kodwa sizolinda umbiko. Konke esikwenzayo, sikwenza ngokubambisana noMnyango wezeMvelo KwaZuluNatal.
“Ngiyafisa nokuthi ngisebenzise leli thuba ngibonge kuzona zonke izinhlaka zomphakathi nezinkampani ezingomakhelwane bethu, ngokubambisana nathi kubhulwa umlilo,” kusho uMnu Knoesen.