Uveza okumumisa isibindi umqeqeshi wePirates
Uphawula nangesimo sikaLepasa ngaphambi koweCarling Knockout
UMISWA isibindi wukuthi usesiqonda kahle isitayela sikanobhutshuzwayo waseNingizimu Afrika uJose Riveiro ongumqeqeshi we-Orlando Pirates esiphenduke ikhaya lezindebe selokhu eyijoyine ngasekuqaleni kwesizini edlule ka-2022/23.
IPirates izovovana inkani neCape Town Spurs esigabeni sikalast 16 kwiCarling Black Label Knockout kusasa ngoLwesihlanu ngo-19h30 e-Orlando Stadium, eSoweto. Lo mdlalo uzokube ubhekwe ngamehlo abomvu njengoba uRiveiro engakaze ehlulwe emdlalweni wenkomishi yomkhumulajezi yakuleli selokhu afika. URiveiro usenqobe izinkomishi ezintathu selokhu efikile kule kilabhu. Utshele abezindaba izolo ukuthi bazoqhubeka nokusebenza kanzima ukuze bezolokhu bejabulisa abalandeli babo ababeseka ngaso sonke isikhathi. “Sethemba ukuthi sizokwazi ukwenza kahle nakulo mqhudelwano njengoba senzile kweyaphambilini. Sibe nekhefu leFifa lamasonto amabili engikholwa wukuthi lizosisiza kakhulu
Uthi kabasishintshi isikimu ngoba nakhu besuke bedelela amakilabhu abasuke bezobhekana nawo kodwa bakwenziswa yisimo semidlalo. “Inhloso yethu enkulu ukwenza kahle ngaso sonke isikhathi. Nakuba ukuthola ikhefu sikujabulela kodwa besingathanda ukudlala sisanda kunqoba ngoba lokho kukwenza uhlale ukulangazelele ukwenza kahle,” esho. Ebuzwa ngoZakhele Lepasa obekusabalele imibiko yokuthi udube ukuhamba neqembu lesizwe iBafana Bafana, uthe: “Kangithandi ukuphawula ngezinto ezenzeke kwiBafana. Engikwaziyo nje wukuthi ngaphambi komdlalo wamanqamu we-MTN8 uLepasa wayengekho qatha ngokwanele kodwa sazama ukumfaka ukuba alekelele ikilabhu. “Uhambile neBafana wabuya, thina sizokwazi emahoreni awu24 ukuthi singamsebenzisa yini. Uma eseluleme sizomdlalisa kodwa uma engakalungi sizobheka abazovala izikhala,” esho.
NGOMGQIBELO
EMpumalanga Stadium: Golden Arrows vs Cape Town City 15h00.
ENelson Mandela Bay: Chippa United vs Stellenbosch 15h00.
E-FNB Stadium: Kaizer Chiefs vs AmaZulu FC 18h00.
EPeter Mokaba Stadium: Sekhukhune United vs Royal AM 20h15.
NGESONTO
EKing Zwelithini: Richards Bay vs Moroka Swallows 15h00.
E-TUT Stadium: SuperSport United vs Polokwane City 18h00.