UZOPHOLISA ISILONDA NGOKUBUYELA ETHEKWINI
UZOSEBENZISA ikhonsathi ukubonga abalandeli bakhe baseThekwini umculi owaphoxeka eshelwa yiphimbo enandisa ngesikhathi egcina ukunandisa kuleli dolobha.
USamkelo Mdolomba owaziwa ngelikaSamthing Soweto uzobuyela eThe Playhouse, eThekwini, ngoMgqibelo mhla ka-28 kwephezulu ezonandisa kwikhonsathi ebizwa The Future Is Now, lapho ezobe ehambisana nomzwilili wakuleli uZoe Madiga. USamthing Soweto ubuyela kule ndawo nje, kuzokhumbuleka ukuthi egcina ukunandisa kuyona washelwa yiphimbo, kwaphoqeleka ukuba angaziculi zonke izingoma zakhe. Uthi uzizwa ethobekile ukubuyela eThekwini ngoba besingakapholi isilonda sokwenzeka ngonyaka owedlule, ehluleka wukujabulisa abalandeli bakhe ngendlela ayefisa ngayo. “ITheku lisenhliziyweni yami, benginesilonda ngokwangehlela, bengilokhu ngifisa ukubuya ngizobathoba amanxeba, ngiphinde ngibonge indlela abangeseka ngayo. “Abantu baseThekwini bangimangaza ngoba abazange bangihhahhameze ngesikhathi ngehlelwa yileli bhadi, kodwa bakhombisa ukungeseka bacula nami kwezinye izingoma engase ngihluleka wukuzicula kahle ngenxa yephimbo lami,” kusho yena.
Uqhuba ngokuthi ngesikhathi ethola ithuba lokuthi abuyele kuleli dolobha, akazange acabange kabili kwazise bekuvele kuyisifiso sakhe ukuzobonga abalandeli bakhe.
Lo mculi uke waba sematheni ngesikhathi ehlaselwa wukhwantalala ngesikhathi izwe livaliwe ngenxa yokhuvethe.
Uthi nakuba ukubhekana nokhwantalala kwaba yisikhathi esinzima empilweni yakhe, uyajabula ukuthi wakwazi ukudlula kuleso sikhathi futhi wafunda okuningi okuphathelene nempilo.
“Esikhathini esiningi njengabaculi sihlale sisezindaweni zobumnandi, simatasa. Asisitholi isikhathi sokuthi sizinike ithuba lokuzinuka amakhwapha ngenxa yokuphithizela kwempilo.
“Isikhathi sokuvalwa kwezwe sanginika lelo thuba, ngabona ukuthi kahle kahle nginomzwangedwa ngaphakathi. Okuhle wukuthi njengoba izwe livulekile sengiyakwazi ukuhlelela isikhathi sami nesokusebenza. Sengiyazikhetha nezinto engizidlayo nengizenzayo ngesikhathi esithize,” kusho yena.
Lo mcimbi uzoqala ngehora lesikhombisa ngoMgqibelo, amathikithi awo ayatholakala eWebtickets nasePick and Pay ngoR300.