Ibonakele imisebenzi yokuzikhandla siwashisa ijezi iKaizer Chiefs
SAPHINDA sahlangana futhi siwumndeni woSuthu!
Niyazi ukuthi bengilokhu nginidwebela isithombe ngesikhathi sekhefu leFifa ngokuqhubeka kahle kwamalungiselelo ekilabhu ngaphansi kweso elibukhali lomqeqeshi wethu, uPablo Franco Martin.
Phela ngukaputeni wethu kuphela obengekho, uVeli Mothwa njengoba ebebizelwe kwiBafana Bafana.
Abalandeli bazomangala ukuthi empeleni uMothwa uzicije kanye nje nekilabhu ngaphambi komdlalo wangoMgqibelo esihlule kuwona iKaizer Chiefs ngo-1-0, siyikhipha kwiCarling Black Label Cup.
Phela wabuya kuleli bephuma e-Ivory Coast entathakusa yangoLwesine. Ngifisa simbongele ngokumela ikilabhu ezingeni eliphezulu. Sikushayela ihlombe Veli!
Okunye okujabulisa kakhulu wukudlulela kuma-quarter final eCarling emuva komsebenzi onzima owenziwe ngabadlali nabaqeqeshi.
Ukuzinikela kwabo kusisondeze eduze kwempumelelo esiyidingayo. Igoli likaTaariq Fielies elingene ngomzuzu ka-88, lisijabulise ngokungachazeki. Qhubekani nomsebenzi omuhle.
FIKANI NGOBUNINGI KUSASA EMABHIDA UKUMBOZA IPIRATES
Ngifisa ukubongela iqembu lethu lika-U/13 ngokunqoba iligi. Ikhono labo, ubuchule nokuzinikela yikhona okwenze bazuza lo mqhele. Niyikusasa lekilabhu, qhubekani nokuqhakaza!
Maduzane sizomemezela ukwethulwa ngokusemthethweni kwamaziko amasha abalandeli. Lokhu kukhomba ukukhula komndeni woSuthu.
Phela lokhu bekungeke kube yimpumelelo ngaphandle kothando nokwethembeka enikukhombisa ekilabhini.
Kusasa ngoLwesibili sizobhekana ne-Orlando Pirates koweligi eMoses Mabhida Stadium ngo-19h30. Yebo, sesingenile kuma-quarter final eCarling, kodwa manje sekumele sigxilise imiqondo yethu eligini.
Nakuba siyihlonipha iPirates, kodwa indawo esihleli kuyona kwilog iyaphoqa ukuba singesabi muntu ukuze siqoqe amaphuzu esiwadingayo.
Amathikithi atholakala eTicketPro nasezitolo zakwaSpar ngo-R60 awabadala no-R40 izingane. Izitha zethu kumele zifike sesizilinde ngengoma! Kanti kulindwe bani?
Ningakhohlwa yiBootcamp ezokuba sePeople’s Park ngaseMoses Mabhida Stadium. Ukuba yingxenye yayo u-R125 kanti konke esizokwenza kuzoqala ngo-8 kuya ku-10 ekuseni.
Amathikithi athengiswa esitolo sethu, AmaZulu Fan Experience, esiseMoses Mabhida. Ngizohlale nginiphakela zishisa ezenzeka oSuthwini, okwenu wukubeka indlebe. Ugqozi nothando lwenu lwenza sihlale siwumndeni ohlangene oSuthwini. Uma siyimbumba akekho ongasithinta! Hebe!