UMQEQESHI WOSUTHU UBALISA NGE-PIRATES
UMQEQESHI wamaZulu FC uPablo Franco Martin ubalisa ngokuqhathwa nezinkunzi zaseSoweto emidlalweni ehlukaniswe yizinsuku ezimbili okuzokwenza ukuba ezakhe zingakwazi ngisho ukwelula imisipha phakathi kwayo (imidlalo).
USuthu luzogadulisana ne-Orlando Pirates koweDStv Premiership kusasa ngoLwesibili ngo-19h30 eMoses Mabhida Stadium, eThekwini.
INyokan’ Eluhlaza izokuya kulo mdlalo nje, iphuma komunye onzima njengoba iwashise ijezi iKaizer Chiefs ngo-1-0 kwiLast 16 yeCarling Black Label Cup ngoMgqibelo ebusuku eFNB Stadium, eGoli.
Kulo mdlalo uSuthu lunqobe ngegoli likaTaariq Fielies elingene ngomzuzu ka-88. Ukunqoba koSuthu kwenze abalandeli beChiefs balwa, befuna igazi likaMolefi Ntseki ongumqeqeshi. UPablo utshele abezindaba ukuthi kabukho ubulungiswa ekutheni badlaliswe imidlalo emibili enzima ezinsukwini ezintathu.
Ukhale ngokuthi iPirates izothola isikhathi esithe xaxa sokuphumula njengoba owayo weCarling iwudlale ngoLwesihlanu, ikhipha iCape Town Spurs ngo-2-0 eSoweto. Kulo mdlalo kugqame uThembinkosi Lorch obesenesikhathi eside agcina ukubonakala kwiBucs, ogcine eqokwa njengomdlali wosuku wahamba noR100 000. KoweChiefs noSuthu kuqokwe uKeagan Dolly. “Kunzima ukugijima imidlalo enzima izinsuku zilandelana. Njengoba siphuma kwiChiefs, ngeke sibe naso isikhathi sokulungiselela umdlalo wePirates ngenxa yokusondelana kwezinsuku. Kodwa-ke kayikho into esizoyenza, sizodlala ngoLwesibili. “Bengicabanga ukuthi iligi izosinika izinsuku ezilinganayo zokuzilungiselela ngoba sonke silwela into eyodwa, ukuqeda sisendaweni enhle kwi-log.
“Yize kunjalo, siwulindele ngabomvu umdlalo wethu nePirates,” kusho uPablo ozokube ebhekene nomkhaya wakhe waseSpain, uJose Riveiro.
AmaZulu azodlala lo mdlalo ngaphandle kwesiqonqwane sawo u-Abbubaker Mobara onekhadi elibomvu.
Amathikithi alo mdlalo abiza uR60 awabadala kanti awezingane awu-R40 eTicketPro nasezitolo zakwaSpar.