I-BAY FC ISIYIPHUZE INYONGO ISWALLOWS
IQHUBEKILE nokwenza iMoroka Swallows ithofi layo iRichards Bay FC iyikhipha ngo-2-1 koweLast 16 kwiCarling Back Label Knockout izolo ngeSonto ntambama eKing Zwelithini Stadium, eMlazi.
Amagoli eBay ashaywe ngu-Abel Mabaso ngomzuzu ka-15 noYonela Mbuthuma ngoka-61, kwathi eleSwallows leza noGabadinho Mhango ngoka-51.
ISwallows ize kulo mdlalo ngenhloso yokuzoziphindiselela kwazise iBay iyehlule emdlalweni weligi, ekubeni beyingakaze yehlule muntu (iBay) kule sizini.
Kubukeka sengathi iBay isiyiphuze inyongo iSwallows.
USteve Komphela, ololonga iSwallows, ukhale ngodonga lwakhe lwasemuva, wathi lubenzele phansi.
“Ngesiwombe sesibili sibuye saba ngconywana, kodwa nakhona besingebahle kahle.
“Igoli lesibili nalo kube yiphutha lethu,” kusho uKomphela.
UKaitano Tembo oqeqesha iBay, uncome abadlali bakhe ngokuzinikela.
Nokho ukhalile ngokunikwa kuka-Andile Jali umklomelo womdlali ovelele.
Uthi bekufanele unqotshwe nguMbuthuma. Kulo mqhudelwano umdlali ovelele uvotelwa ngabalandeli.
“Kuzofanele ifakelwe izibuko le ndlela yokuvota ngoba kayelekeleli. Le nto ibulala imimoya kubadlali abasebancane.
“Kodwa-ke kungijabulisile ukubona abafana bethu bedlala kahle ngalolu hlobo.
“Okunye okungijabulisile wukuthi sishaye amagoli amabili.
“Ngiyethemba ukuthi sizoqhubeka nalo mgqigqo nasemdlalweni wethu weligi olandelayo neCape Town City,” kusho uTembo.
* Imiphumela yemidlalo kaLast 16 yeCarling imi kanje: Bay FC 2, Swallows 1; Sekhukhune 1, AM 0; Chiefs 0, AmaZulu FC 1; Arrows 3, Cape Town City 1; Chippa 1, Stellenbosch 2; Pirates 2, Spurs 0; Galaxy (2) (5), Sundowns (2) (4).
* SILOBE ungakapheli umdlalo weSuperSport United nePolokwane City.