Isikhulu sikhale ngepolitiki ngokumiswa koweSama
Sithi siyabona ukuthi osopolitiki balwa impi yabo ngokusebenzisa ezobuciko
SIKHALE ngepolitiki egxambukela kwezobuciko isikhulu seRiSA, okuyinhlangano ehlela umcimbi weSouth African Music Awards (Sama), kulandela ukumiswa koxhaso loMnyango wezokuThuthukiswa koMnotho nezokuVakasha KwaZulu-Natal.
Lo mcimbi bekumele wenzeke kulesi sifundazwe ngempelasonto yangomhla ka-17 no-18 kuLwezi (November).
Izolo ngoLwesithathu ungqongqoshe walo mnyango, uMnu Siboniso Duma (osesithombeni), umemezele ukuthi bakumisile ukuxhasa lo mcimbi ngemuva kokwelulekwa yikhabhinethi yesifundazwe nezinhlaka zomnyango.
Uthe usexhumanile nezikhulu zomnyango ukuze zazise iRiSA ngalesi sinqumo, naye uzobuyela kwikhabhinethi ukuyobika njengoba isinqumo sokusingatha lo mcimbi obuzoba seNkosi Albert Luthuli Intenational Convention Centre (ICC), eThekwini besithathwe ngokuhlanganyela.
UDuma utshele abezindaba ukuthi kungamampunge ukuthi umnyango wakhe ubuhlela ukusebenzisa imali engango-R28 million kulo mcimbi.
Uthe ngokwemiyalelo nokulawulwa yimigudu kaMgcinimafa, bebebeke imali engango-R20 million ngawo.
Ukumiswa kokusingathwa kwalo mcimbi kususe umsindo kulesi sifundazwe. Amaqembu aphikisayo akhale ngezizumbulu ebezizochithwa wuhulumeni ngawo.
Lesi samba yisona esisukumise la maqembu ezepolitiki, akhala ngokuthi inkulu le mali ukuhlela lo mcimbi wangempelasonto eyodwa ekubeni lesi sifundazwe sibhekene nezinkinga ezahlukene zokulethwa kwengqalasizinda.
Ukungenami kwe-Action SA, kugcine kuholela ekutheni ibhalele uMengameli uMnu Cyril Ramaphosa, ikhononda ngalolu xhaso. Ngokusho kukaMnu Zwakele Mncwango ohola leli qembu KwaZulu-Natal, akuthathanga isikhathi esingakanani ngaphambi kokuthi umengameli ayiphendule incwadi abayibhalile njengeqembu.
Izolo ngoLwesithathu ngaphambi kwesimemezelo sikaDuma, kusabalale kwabezindaba ukuthi umengameli useyalele ukuthi kumiswe ukuxhaswa kwalo mcimbi.
Isikhulu esiphezulu sakwaRiSA uMnu Nhlanhla Sibisi, sikhale ngepolitiki egxambukela kwezobuciko ngesikhathi sibuzwa ngokuhoxiswa koxhaso lomnyango.
“Esikubonayo wukuthi osopolitiki balwa impi yabo ngokusebenzisa ezobuciko.
“Nakuba kuwumcimbi wempelasonto eyodwa, kodwa inzuzo iba ngaphezulu kwemali umnyango obuzoyifaka njengoba uhanjelwa yizinkulungwane zabantu abaqhamuka ezindaweni ezahlukene.
“Kuqashwa amahhotela, kuthengwe nokudla kukhuphuke nezokuvakasha, okuyizinto ezikhulisa umnotho namathuba emisebenzi,” echaza
USibisi uveze ukuthi lezi zindaba zibehle ngenhla njengoba bebengakahlangani nomnyango, bathole incazelo ejulile ngalokhu.
“Njengoba sinenkontileka nomnyango, sisazohlangana sicabe indlela eya phambili ngokuthi kuzokwenzekani ngalo mcimbi kulo nyaka,” kusho yena.
Uthe okwamanje ngeke akwazi ukuveza ukuthi bazoqhubeka kanjani kuya phambili njengoba esazohlangana nazo zonke izinhlaka ezithintekayo.
UDuma uthe basazimisele ngokusingatha imicimbi emikhulu kulesi sifundazwe njengoba iba nendima emqoka ukuthuthukisa umnotho nokwakha amathuba emisebenzi.