Sebezophuza amanzi ahlanzekile eNquthu
Imeya ikhale 'ngosomabhizinisi' abenza izenzo zobugebengu
IKHALE ngokwanda kwezigameko zokuphazanyiswa kwezinhlelo zokufakwa kwamanzi emphakathini engaphansi kukaMasipala wayo, iMeya yaseMzinyathi, uMfu Petros Ngubane (osesithombeni).
Ikusho lokhu izolo ngoLwesithathu ngesikhathi yethula uhlelo lokufakwa kwamanzi eNquthu, ezigodini ezahlukene okubalwa esaKwaVuyiza, iMazicentela, iNtababomvu nakwezinye.
Ithe kunabantu abazibiza ngosomabhizinisi abangaphansi kwenhlangano Amadela Ngokubona. UNgubane uthe lo mkhuba udla lubi kumaphrojekthi angaphansi kukaMasipala waseNquthu.
Uthe okukhathazayo wukuthi eNquthu kabekho abantu abangamalungu ale nhlangano.
“Lapha eNquthu kuvele kuqhamuke abantu esithubeni, bezibiza ngokuthi bangosomabhizinisi basendaweni, ekubeni kungekho noyedwa owaziwayo kubona.
“Sikhathazekile ngokwanda kwezigameko ezenziwa yilaba bantu ngoba zihambisana nobugebengu,” kusho imeya uNgubane.
Lolu hlelo oluzodla u-R34 million, luhlanganisa ukufakwa kwamapayipi, amathangi amabili nompompi abawu-135 abazimele, abaxhunywa emphakathini.
UNgubane uthe la manzi azofakwa kulezi zindawo kuzoshaya uKhisimusi wonyaka ozayo umphakathi usuwaphuza.
“La manzi esiwethula namhlanje alandelwa ngesiwathule eThelezini adle u-R16. 4 million, sadlulela kwaNyezi sashiya u-R15 million wokufaka amanzi. Sisuke lapho saya eNtinini, safaka amanzi adle isamba sika-R18. 5 million.
La manzi engikhuluma ngawo ethulwe kulo Masipala waseNquthu kuphela. UMsinga unawawo amanzi esiwethule ezindaweni ezahlukene okubalwa koPharafini nezinye,” kusho imeya.
UMnu Phangi Mbuyisa oyisakhamuzi, uthi liphume nobomvu ngoba amanzi bebewaphuza nezimbongolo. Uthe sebezokwazi ukutshala njengoba nokudla kubiza kangaka.
“Sibonga kakhulu kwiMeya uNgubane ngokusifakela amanzi. Siyethembisa ukuthi siwumphakathi sizosebenzisana nosonkontileka ukuze lo msebenzi uphele ngesikhathi obekelwe sona," kusho uMbuyisa.
Imeya ithi umsebenzi wamanzi eNhlopheni, eNtinini, eThelezini, eNquthu uyaqhubeka.
Endaweni yaseMsinga eNkubungwini, Ogunjani, eMthembu West ziyaqhubeka izinhlelo zokufaka amanzi.
Iphethe ngokunxenxa umphakathi ukuthi usebenzisane nosonkontileka, ungaphazamisi uhlelo lokufakwa kwamanzi ngoba lezi zinyanga eziwu-12, sizoshaya zedlule uma usonkontileka ephazamiseka amanzi engafikile kubantu.