Umbuthano we-AGOA yithuba lokuqinisa ubudlelwano bethu neMelika
KUYANGIJABULISA ukuthi ekuqaleni kwenyanga ezayo umbuthano wemboni ezimele nezikhulu zaseMelika i-African Growth and Opportunity Act (AGOA) Private Sector Forum, uzoqhubeka ubanjelwe eNingizimu Afrika.
Baningi abashaya umthetho eMelika abebephakamisa ukuthi lo mbuthano uthuthelwe kwenye indawo.
Bayabuza ukuthi kusafanele yini sihlomule esivumelwaneni esenza amanye amazwe ase-Afrika ahlomule okuthe xaxa uma ehwebelana neMelika, i-AGOA, ngoba lesi sivumelwano senzelwe amazwe angabeki engozini ezokuphepha zeMelika.
Kodwa lo mbuthano usinika ithuba thina bamabhizinisi bakuleli ukutshengisa ukuthi kubaluleke kangakanani ukuhwebelana phakathi kwala mazwe womabili.
Siyakuqonda ukuthi iMelika kuyethusile ukusibona sisebenzisana nezokuvikela zaseRussia naseChina, futhi savumela nomkhumbi waseRussia ukuthi upake echwebeni eSimon's Town, nebhanoyi elafikele esikhumulweni sezindiza sombutho wezokuvikela kuleli iWaterkloof.
Izikhulu zethu zikhiphe izitatimende eziphikisanayo ngokuthi simiphi neRussia ngesikhathi noMengameli Cyril Ramaphosa ehlangene nowaseRussia, uMnu uVladimir Putin, eSt Petersburg ngoNtulikazi (July).
Bebedinwe beqhuma eMelika ngesikhathi kubhungwa ngobudlelwano beNingizimu Afrika neMelika ngenyanga edlule.
Ukuzama ukulungisa ubudlelwano, maningi amathimba aseye eWashington DC, kwelomkhulu laseMelika, okubalwa kubona abaholi bepolitiki nabamabhizinisi, ukuyoxoxisana nabaseMelika ngezinto ezibakhathazayo.
Ziningi izinto esifana ngazo neMelika, uma sibheka imboni ezimele.
Sobabili singamazwe abuswa yintando yabantu futhi siyawuhlonipha umthetho. Amabhizinisi ethu asebenza emazweni lapho amazinga okuncintisana ephezulu.
Imboni ezimele kula mazwe omabili iyasebenzisana kakhulu, kunezinkampani eziwu-600 zaseMelika ezisebenzela lapha eNingizimu Afrika futhi iMelika ingelinye lamazwe esilidayisela izimpahla zethu, futhi yinhle imali esiyenzayo khona.
IMelika yizwe elibalulekile kithina uma sikhuluma ngokudayisa izimpahla esizikhiqizayo njengezimoto nemikhiqizo yezolimo.
Ukuqhubeka sibe yingxenye ye-AGOA kubalulekile, njengoba sinezinto esizidayisela iMelika.
Kuyacaca ukuthi imizamo yokulungisa izinto iyaphumelela ngoba nanku umbuthano usaqhubeka nokuba kuleli
Ngikubona kuwuphawu oluhle ukuthi ubudlewano bethu buyalungiseka kanti nomphumela wophenyo ngomkhumbi iLady R, owaveza ukuthi abukho ubufakazi bokuthi kwalayishwa izikhali ezelekelela iRussia empini yayo ne-Ukraine, usizile.
Ichazwe kangcono nento yokuthi iNingizimu Afrika kayihambisani namuntu (empini yeRussia ne-Ukraine), okutshengisa ukuthi kuyabonakala ukuthi amazwe aseNtshonalanga abalulekile kithina, yize nokusebenzisana kwethu nawaseMpumalanga kukhula, futhi kufanele siqhubeke sixoxisane nawo.
INingizimu Afrika kufanele ilisebenzise ithuba lalo mbuthano futhi ngiphakamisa ukuthi amalungu eBusiness Leadership South Africa (BLSA) enze njalo.
Izingxoxo zaseMelika ziholwa yiCorporate Council on Africa, ebunjwe ngabamabhizinisi amaningi aseMelika asebenza ezwenikazi lonke.
Umbuthano wenganyelwe wuMnyango wezokuHweba, iziMboni nokuNcintisana, ngokubambisana neBLSA, iBusiness Unity South Africa ne-American Chamber of Commerce.
Ingqikithi yalo mbuthano ithi, “Siyabambisana ukwakha i-AGOA ekwazi ukuzimela futhi engabandlululi, ukweseka umnotho, izimboni nokwakha imisebenzi enohlonze.”
Lokhu kuyahambisana nathi ngoba izinto ezithengwa yiMelika zeseka izimboni eziningi okusiza, umnotho wethu.
Lo mbuthano uzohlanganisa abantu abawu-450 abaqhamuka emazweni angakwazi ukubamba iqhaza kwi-AGOA kodwa njengoba ukuleli zwe, kusinika ithuba elihle lokuqinisa ubudlelwano bethu neMelika.
Kufanele sitshengise ukuthi i-AGOA iwusiza kanjani umnotho waseMelika njengoba ikwazi ukuthenga izimpahla ezisezingeni eliphezulu, kusukela ezimotweni kuya emawayinini.
Lobu budlelwano bubaluleke kakhulu, uma sibheka umthamo wezinto esihwebelana ngazo, kunesinabo neRussia.
Kusukela kwezokuvakasha kuya ekwesekeni imboni yethu yamafilimu, iMelika imqoka futhi i-AGOA iyasiza ukuvikela ubudlelwano bethu nemboni ezimele.
Uma singakunaki kakhulu ukubhimba kwethu kwezepolitiki, ubudlelwano bamabhizinisi phakathi kweMelika neNingizimu Afrika bubalulekile, futhi kufanele sibunakekele.
*UNkz uMavuso uyisikhulu esiphezulu seBLSA