Akhuthazwa wukwesekwa yi-Afrika AmaBhokobhoko
Elakuleli lidonswe ngendlebe ukungahuqi ubuthongo nxa umdlalo usaqala
UKHUTHAZWA wukwesekwa abakuthola ngisho emazweni angaphandle uSiya Kolisi ongukaputeni wamaBhokobhoko azodudulana ne-All Blacks yaseNew Zealand kowamanqamu weNdebe yoMhlaba ngoMgqibelo ngo-21h00 eParis, eFrance.
UKolisi kulindeleke ukuba aqophe umlando ngokuba ngukaputeni wokuqala wakuleli ukuphakamisa indebe yomhlaba amahlandla amabili kulandelana, njengoba nango-2019 kunguyena owayehola elakuleli ngenkathi liphakamisa le nkomishi.
Kubhekwe ngabomvu ukuthi izowela ngakuphi njengoba womabili amaqembu esethubeni lokunqoba le ndebe ihlandla lesine emlandweni.
La maqembu aseyinqobe amahlandla ayisithupha ngokuhlanganyela okwenza kube yiwona womabili asayiphakamise kaningana uma kuqhathaniswa namanye.
UKolisi ekhuluma ngaphambi komdlalo wamanqamu, uvumile ukuthi kumele banyuse amasokisi emuva kokungayiqali kahle imidlalo emibili yemikhumulajezi okwenze babuya sekuvalwe amehlo kuyona yomibili.
“Kuyiqiniso ukuthi kasiyiqalanga kahle imidlalo yethu edlule. Sinethemba lokuthi sizoya kowamanqamu sesizihlele kahle.
“Okubalulekile njengamanje wukuvikela indebe yethu.
Okusinika umfutho wukubona ama-video abantu abasesekayo okusenza sizimisele kakhulu kunakuqala. “Njengamanje kasisamele izwe lethu kuphela kodwa sesimele i-Afrika yonke. Njalo uma singena enkundleni sibeka izwe lethu phambili. Siyazi ukuthi sibhekene nabantu abakulambele ukunqoba kodwa nginethemba lokuthi sizokwenza njengoba siyalelwe ukuze sikwazi ukujabulisa abalandeli bethu abahlale beseseka ngaso sonke isikhathi. Ngisho nasemahhotela esihlala kuwona sithola ukwesekwa okuyisimanga,” esho.
Nakuba ekhuluma kanjena kodwa uyazi ukuthi iqembu lakuleli kumele libhukule kakhulu kunakuqala uma lizimisele ngokuvikela le ndebe.
Ukuqala ngebatha emidlalweni yalo yakamuva ngeke kulisize ngalutho kowamanqamu kwazise iNew Zealand kayigayelwa mphako kulezi zinsuku njengoba idudula kwasani oluphambi kwayo.
Umakadebona we-All Blacks uZinzor Brooke, uxwayise elakuleli ukuba lingalinge lihuqe ubuthongo uma umdlalo usaqala libhekene neNew Zealand ngoba lizosizwa ngendaba lesi sicoco. Wexwayise elakuleli ngobuhlakani buka-Ardie Savea obuyelwe yifomu aziwa ngayo.
La maqembu ake ahlangana ngaphambi kokuqala kwemidlalo yendebe yomhlaba lapho elakuleli elamangaza khona abaningi lidedela isibhaxu sika-35-7 okuyinto eyagcina ukwenzeka eminyakeni eminingi edlule ukuthi iNew Zealand ithole lolu hlobo lwesibhaxu.