KUBANJWA KUYAYEKWA NGOWE-SAMA
BABAMBE umoya abaculi abaqokwe emcimbini walo nyaka weSouth African Music Awards (Sama), njengoba inhlangano iRiSA ibamba iyeka ngokuzokwenzeka kulandela ukubhuntsha koxhaso lukahulumeni waKwaZulu-Natal ngomzuzu wokugcina.
Ngeledlule isikhulu sale nhlangano u-Adv Nhlanhla Sibisi sitshele leli phephandaba ukuthi basazohlangana nazo zonke izinhlaka ezithintekayo ngokuhlelwa kwalo mcimbi ngaphambi kokuthatha isinqumo ngokuzokwenzeka.
USibisi ukusho lokhu ngemuva kokuba uNgqongqoshe woMnyango wezokuThuthukiswa koMnotho nezokuVakasha KwaZulu-Natal, uMnu Siboniso Duma ememezele ukuthi bazolumisa uxhaso lwalo mcimbi.
Ukumiswa kwalolu xhaso kuqhamuke ngemuva kwezinkulumo ngesamba lo mnyango obuzimisele ukusichitha ngalo mcimbi obekumele ube ngomhla ka-17 no-18 kwephezulu.
Amaqembu ezepolitiki esifundazweni yiwona asuse umsindo ikakhulukazi i-Action SA.
Lo msindo ufinyelele nakuMengameli wezwe uMnu Cyril Ramaphosa, okuvela ukuthi nguyena oyalele lo mnyango ukuthi uhoxise lolu xhaso.
Abaculi abese bemenyezelwe ukuthi baqokiwe, basale bencela izithupha ngokuthi kuzokwenzekani ngokuqokwa kwabo.
ULesley Mofokeng okhulumela iSama uthe, akukho abangakusho njengoba imihlangano ngenqubekela phambili isaqhubeka.
“Sizokwazi ukuphawula ngasekupheleni kwesonto ngoba kasikathathwa isinqumo ngokuzokwenzeka,” esho.
Umthombo osondelene nabahleli bamaSama uthi baphithene amakhanda abahleli bawo njengoba kunemibono yokuthi umcimbi wenziwe ngohlelo lwezobuchwepheshe (virtually).
“Njengoba iSABC iyingxenye yalo mcimbi kuphakanyiswa ukuthi kwenziwe isimemezelo ohlelweni oluyisipesheli khona kumabonakude.
“Kunabanye abathi mawenziwe uma kuqala unyaka ozayo kodwa kungabi wumcimbi omkhulu. Engingakusho wukuthi kuyabanjwa kuyayekwa kodwa nanamhlanje (izolo ngoLwesithathu) bazohlangana, kungenzeka kube khona okuphathekayo,” usho.