Masibuyele emuva, sifune umsuka wezinkinga ezisihaqile namuhla
MHLELI: Siyabonga ngoba sesifikile isikhathi lapho abafundi baseNingizimu Afrika, abenza ibanga leshumi, sebefike esiphethweni semfundo yabo yamabanga (Grade).
Sibabongela sinovalo ngokuthi ikusasa libaphatheleni, njengoba izwe lakithi lisesimeni elikuso, ngendaba yokushoda kwemisebenzi.
Kungaba sesikhona yini isisekelo sendlela abazoyithatha kusuka ngonyaka ozayo, lapho abanye bezobheka imisebenzi, abanye baqhube imfundo yabo ezikhungweni zemfundo ephakeme, ngethemba lokuba uma bephothula bazothola imisebenzi, abanye basungule okuthize okuzokwenza baziphilise?
Nayi-ke indaba, abampisholo abasebasha kuvela ukuba yibona abaningi kwabentula imisebenzi.
Ngabe yini le esingayenzi kahle thina abampisholo, esenza kube yithi esisalela emuva kokuningi?
Amandla esinawo njengabantu abampisholo uma sibumbene, makhulu kakhulu kodwa kasiwasebenzisi.
Ngikhuluma kanjena nje, kungoba ziqalile izingane ukubhala izivivinyo zokugcina ngethemba lekusasa eliqhakazile.
Kusenjalo, kukhalwa ngapha nangapha ngezingane ebezingabahloniphi othisha ezikoleni, kuphinde kukhalwe ngokukhulelwa kwezingane zamantombazane ezisencane.
Nathi safunda nje, lezi zinkinga esizibona namuhla zaziyivela kancane ngezikhathi zethu. Ngabe konakelephi kulezi zanamuhla izingane? Ngabe akonakele yini emuva ekhaya, ngabe lokhu esikubonayo kakuwona yini amaphutha abazali enzeke izolo nakuthangi, aseziveza ezinganeni namuhla?
Amafindo esawabopha siqondile noma singaqondile, akuwo yini lawa esebopha izingane zethu namuhla?
Ngithi-ke make sigawule sibheke uma sikhuluma noma senza, ngoba lokhu okuphuma emilonyeni yethu akungcolisi thina kuphela, kepha kungcolisa imuva lethu kanjalo nekusasa, bese kuziveza ezinganeni lezi esithi ziyikusasa lezwe.
Okuningi esikhala ngakho namuhla, akuqhibukanga wena owabona ikhowe kepha kuqale kuziveza kancane kancane.
Kumele sibheke emuva ukuthi konakelephi, noma yini esingayenzi kahle esiba yisibopho namafindo namuhla nakusasa.
Ngelinye ilanga ngiyofisa ukuba sibuyele kwamhlaba, sibe ngabantu abanobuntu futhi abalikhathalele nekusasa.
Makwande ukukhanya, kudede ubumnyama.
Makhosi Zimisele Mbongwa, KwaDumisa, eMzinto