UMESSI UDALULA INGCINDEZI ABEBHEKENE NAYO UKUNQOBA INDEBE YOMHLABA
UBALISE ngobunzima abebhekene nabo ngokuhluleka ukunqoba iNdebe yoMhlaba uLionel Messi ongumdlali we-Inter Miam yaseUnited States of America (USA), ngesikhathi eklonyeliswa ngomklomelo womdlali ovelele emhlabeni (Ballon, D Or).
Lo mcimbi ubungoMsombuluko ebusuku eParis, eFrance. Ubuhanjelwe yinqwaba yabadlali abahlonishwayo emhlabeni. UMessi unqobe lo mklomelo ihlandla lika8 okwenze wayishiya kude imbangi yakhe uCristiano “CR7” Ronaldo osayiqukule kayisihlanu.
Ekhuluma emuva kokuklonyeliswa kwakhe uMessi, uthe: “Kangikaze ngiziphuphe ngifika kuleli zinga esengikulona njengamanje. Ngikholwa wukuthi ukudlala emakilabhini amakhulu kube nesandla empumelelweni yami. Ngizizwa ngijabule ngebanga esengilihambile.
“Ngonyaka ofile nganqoba iCopa America neNdebe yoMhlaba (yeFifa) eQatar, okuyinto ebingihlukumeza kakhulu empilweni yami (ukungayinqobi indebe yomhlaba).
“Ngathola ubunzima ngokungakwazi ukuyinqoba kodwa ngomusa kaNkulunkulu ngakwazi ukufeza iphupho ngokubambisana nozakwethu eqenjini lesizwe laseArgentina. Ngizizwa ngijabule kakhulu lapho engikhona njengamanje.
“Ngiyazi ukuthi iminyaka kayimile kodwa ngeke ngize ngiyeke ukuqhubeka nokudlala uma imilenze isavuma ukugijima. Umdlalo webhola uyimpilo yami. Ngiyabonga kubona bonke abahlale bengeseka,” kusho lo mdlali.
UMessi uqophe umlando ngokunqoba lo mklomelo amahlandla amaningi, okuyinto engakaze yenziwe ngomunye umdlali kanobhutshuzwayo emhlabeni wonke jikelele.
Njengamanje lo mdlali useholidini njengoba iligi adlala kuyona isavalile. Kunemibiko ethi iBarcelona yaseSpain ifuna ukumboleka ukuzodlala kuyona okuyinto evumelekile ukwenziwa kuleliya zwe.