UMQEQESHI WOSUTHU AKENEME NGEYE-DOUBLE HEADER
AKAYIZWA nhlobo eyokuvunyelwa kwemidlalo emibili igijinywe enkundleni yabo ngosuku olulodwa umqeqeshi wamaZulu FC, uPablo Martin (osesithombeni).
USuthu luzoshukana neLamontville Golden Arrows kwi-quarter final yeCarling Black Label Knockout ngoMgqibelo ngo-19h00 eMoses Mabhida Stadium, eThekwini.
Ngale mpelasonto kuzoqopheka umlando njengoba kuzogijinywa imidlalo emibili ngosuku olulodwa kule nkundla.
I-Orlando Pirates izogadulisana neRichards Bay emdlalweni wokuqala ozokuba ngo-15h00 kuyo le nkundla.
Abalandeli bebhola bakulangazelele ukuzobuka le midlalo kwazise kuzobe kungokokuqala selokhu kusungulwe iPremier Soccer League (PSL).
UMartin ebuzwa ukuthi uzizwa kanjani njengoba kuzogijinywa imidlalo emibili ngosuku olulodwa enkundleni yabo, nanokuthi uzizwa kanjani njengoba bezogijima umdlalo wesibili okungenzeka inkundla ibe seyonakele uthe: “Kangiyithandi le nto. Le nto kayisivuni thina ngoba ngeke sikwazi ukusebenzisa inkundla yethu yasekhaya ngendlela esifuna ngayo.
“Bekufanele sidlale enkundleni yethu, sijime enkundleni yethu kodwa njengamanje kasazi noma sizolithola yini ithuba lokujima kuyona ngosuku olwandulela le midlalo okuyinto engasivuni.
“Kayisivuni le nto ngoba sikhempa kuyona le nkundla, sidla isidlo sasemini kuyona le nkundla. Imihlangano yethu yangaphambi kwemidlalo siyibambela kuyona. Kumanje silindile ukuzwa ukuthi kuzokwenzakalani ngendlu yethu yokushintshela.
“Simincile ngoba kasazi noma sizokwazi yini ukudlala uhlobo lwebhola esifuna ukulidlala njengoba singazi ukuthi isimo senkundla sizobe sinjani emuva komdlalo wokuqala.
“Le nto ngiyibona ivuna i-Arrows ngoba ikujwayele ukudlala kulezi zimo. Nokho ekugcineni yikho lokhu esibhekene nakho. Noma ngabe yisimo esinjani esibhekene naso kodwa sizokwenza konke ukusemandleni ukudlala ngokuzinikela,” esho.
Uthi ubambe umoya ngabadlali bakhe abalimele uRamahlwe Mphahlele, uTaariq Fielies noVeluyeke Zulu abangazange bajime noSuthu izolo ngoLwesithathu ekuseni.
“Okwamanje akukho okutheni engingakusho ngabo kuze kube kunquma ithimba lodokotela,” esho.