Basonga ukwephula irekhodi lePirates
I-Richards Bay FC ifuna ukuba ngeyokuqala ukuyikhipha kowendebe
USONGELA i-Orlando Pirates abazobhekana nayo kowenkomishi umgadli weRichards Bay FC, uSomila Ntsundwana. IBay izotholana phezulu neBucs kwi-quarter final yeCarling Black Label Knockout ngoMgqibelo ngo-15h00 eMoses Mabhida Stadium, eThekwini. Lolu suku lwangoMgqibelo lubhekwe ngabomvu ngabathandi bakanobhutshuzwayo njengoba kuzoqopheka umlando kugijinywa imidlalo emibili ngosuku olulodwa enkundleni eyodwa.
Emuva kwalo mdlalo weBay neBucs kuzogadulisana omkhaya AmaZulu FC neLamontville Golden Arrows ngo-19h00.
UNtsundwana ekhuluma ngomdlalo wabo neBucs, uyisongela kanzima le kilabhu engakaze yehlulwe emdlalweni womkhumulajezi wakuleli selokhu yajoyinwa nguJose Riveiro waseSpain ngasekuqaleni kwesizini edlule. URiveiro usenqobe izicoco ezintathu kuleli okungezimbili zeMTN8 neseNedbank Cup.
“Amalungiselelo ethu ahamba kahle uma ubheka ukuthi sibuya endukwini eyenze imimoya yethu yashona phansi. Kodwa-ke ngikholwa wukuthi lo mdlalo ufike ngesikhathi esihle lapho sifuna ukubuyisa ukuzethemba njengoba kuwumdlalo wenkomishi.
“Kulo mdlalo siyohlasela nje kuphela, vele ngeke silahlekelwe yilutho. Kasenzi kahle emidlalweni yeligi kodwa njengoba siya kowenkomishi kuhle kakhulu ngoba siyobhekana nekilabhu enkulu. IPirates nayo kayenzi kahle kwiligi kodwa kweyezinkomishi igila izimanga.
“Kodwa-ke kule mpelasonto ngifuna ukukubeka kucace ukuthi siyoqopha umlando ngokubakhipha kulo mqhudelwano ukuze sibuyelwe wukuzethemba. Sibafihlele induku emqubeni,” kusho uNtsundwana.
Ube esethumela umyalezo kubalandeli beBay abawa bevuka nale kilabhu kukuhle kukubi.
“Siyazi ukuthi kunzima imiphumela iyasiphika kodwa siyabadinga ukuba bazosifaka umfutho. Ngaphandle kwabo ngeke sibe yilutho. Uma sibona bona bemamatheka siba nakho ukuthi kufanele singabaphoxi, sibalwele. Ngebhadi izinto kazikasivumi kodwa siyabacela ukuba baphume ngobuningi babo bazoseseka.
“Siyacela ukuba baqine, iyeza imiphumela emihle. Nathi siyakuqinisekisa ukuthi bazojabula, iPirates ifike ekugcineni manje, lokho kangikungabazi, sizofela kuyona kulo mdlalo,” kusho uNtsundwana.
IPirates kubhekwe ukuba isizwe ngamagalelo kaZakhele Lepasa, uMonnapule Saleng noKermit Erasmus abajwayele ukuqhamuka neminyakazo exoxa indaba kungakhathalekile ukuthi umdlalo bawuqalile noma basuka ebhentshini.
Amathikithi okubuka le midlalo abiza uR80 eTicketPro.