'Besishintshanisa abesifazane sisejele isiboshwa esisolwa kwelokusoconga iphoyisa'
SISHINTSHA abesifazane sisejele isiboshwa saKwaMaphumulo esisolwa ngecala lokwakha itulo lokubulala iphoyisa likamasipala weTheku, sihlangene nenkosikazi yalo. ILANGA libe nengxoxo ekhethekile nomndeni kaKhulani Cele (37) odonsa isigwebo sikadilikajele ngecala lokubulala ikhansela.
UCele ubevele eNkantolo yeMantshi yaseMlazi ngoLwesibili ngecala lokubulala uCapt Thomas Ntombela, owadutshulwa emzini wakhe ngoNhlaba (May).
UCele ubevele noNkk Nongcebo Ntombela oyinkosikazi kaCapt Ntombela, okusolwa ukuthi balakha naye itulo lukubulala, esejele.
Umndeni kaCele uveze ukuthi selokhu aboshwa, sekufike inqwaba yabesifazane okusolwa ukuthi unobudlelwano nabo yize esejele, ebalutha ngamanga, abanye behamba ngezimoto zikanokusho.
Umndeni utshele ILANGA ukuthi uCele ulutha abesifazane ezinkundleni zokuxhumana, abakhohlise ngokuthi ungomunye wosopolitiki abaziwayo KwaZulu-Natal. Umndeni uthi abanye bebefika bengazi ukuthi umuntu abathandana naye udonsa isigwebo sikadilikajele.
Ilungu lomndeni elicele ukungadalulwa, lithi uCele sekukaningi efaka umndeni wakhe ekukhulumeni njengoba waboshelwa icala lokubulala ikhansela. Lithi ngaphambi kokuboshwa ngo-2010, wayevele egangile ngoba uke wathinteka ecaleni lokwebiwa kwemfuyo yakwamakhelwane.
“Emuva kokuba esolwe ngokweba imfuyo, wabaleka ekhaya wayohlala eMandeni. Wafika nakhona waqhubeka nokuganga, wabe esethinteka ecaleni lokubulawa kwekhansela. Wake wafika nangayo imoto yekhansela ayelibulele ekhaya ngosuku aboshwa ngalo,” kusho ilungu lomndeni.
Liqhuba, lithi selokhu aboshwa uCele, sekukaningi kufika abantu besifazane kubo, abanye behamba ngezimoto zikanokusho, baveze ukuthi banobudlelwano naye yize esejele.
Kubona kubikwa ukuthi kuke kwafika noyiphoyisa likamasipala weTheku. Lithi abanye bafika bekhithize igilosa, baze basabe ngisho ukubabuza ukuthi bayazi yini ukuthi umuntu abanobudlelwano naye usejele.
“Bangaphezulu kwabathathu abantu besifazane asebeke bafika ekhaya, baveza ukuthi banobudlelwano noKhulani. Bekusixaka lokhu kodwa sisabe ukubabuza ngoba singasazi isivumelwano sabo naye. Abanye baveza ukuthi baxhumana naye ezinkundleni zokuxhumana. Ngikhumbula ukuthi omunye wabo owazibiza ngoMaMkhize, wafika ekhaya ngoMbasa (April) kuwona lo nyaka, eyalelwa nguyena uKhulani indlela. Wafika ngemoto wazethula, wabe esemshayela ucingo ekhuluma naye sizwa nathi.
“Wasifaka emotweni wahamba nathi saya edolobheni, wathi masithathe konke esishoda ngakho ekhaya, sathenga igilosa.
“Omunye wesifazane wayeqhamuka eNkandla, naye wafika ekhaya ngaye uKhulani. Ngiyacabanga ukuthi yena wafike wabona ukuthi sixakekile ngoba wahamba engumuntu obuyayo kodwa wangaphinde wabuya.
“Sizwa kuthiwa ubebuye azibize ngosopolitiki abaziwayo ezinkundleni zokuxhumana, sisola ukuthi uma befika ekhaya, bayabona ukuthi akuyona le nto abebeyilindele, bese behamba bengabe besabuya,” kusho ilungu lomndeni.
Liveze ukuthi sebehlala ngokwesaba emndenini njengoba kusanda kufika amaphoyisa, abathatha beyobhala izitatimende. Lithi kungaleso sikhathi lapho bathola khona ukuthi uyathinteka ecaleni lokufa kwephoyisa, nokuthi ubehlangene nenkosikazi yalo.
“Thina sizihlalela emakhaya, asinawo ngisho umabonakude. Size sathola sesitshelwa ngamaphoyisa ukuthi uKhulani wenzeni. Kwaba yingaleso sikhathi esangena ngaso ezinkundleni zokuxhumana emithonjeni yezindaba safunda ngokuthi kwenzekani,” lisho.
Lithi bayafisa ukuhlangana nabakwaNtombela ukuze bezoxolisa kubona, nokubona uCele ukuze bezomncenga ukuba ayeke lezi zinto azenzayo ngoba zifaka umndeni ekukhulumeni.