KUSHISWE AMAKHUMBI AKWAZIMDOLLAR
UTHUKA izanya uSihlalo kasoseshini iBhucanana Taxi Association, eMpangeni, kwesakwaBiyela uMnu Vikinduku Biyela (42), kulandela ukushiswa kwamatekisi akhe amane ngempelasonto.
UBiyela ongumfowabo omdala womsakazi woKhozi FM, uZimiphi “Zimdollar” Biyela, amatekisi akhe ashiswe esezindaweni ezahlukene lapho ebehlala khona kubashayeli bawo.
UBiyela utshele ILANGA ukuthi uhlalele ovalweni, usabela nempilo yakhe ngemuva kwalesi sigameko. “Ngisola umbango wamatekisi, laba bantu bafuna ukungibona ngifile. Isehlakalo sokuqala bangidubula ngasinda ngoNhlangulana (June).
“Kudlule lapho kwafika abantu erenki, bazenza amaphoyisa, bathi makuvalwe imali eqoqwa erenki, kwasixaka lokho ngoba le mali senza ngayo izidingo zikasoseshini.
“Esikhathini esifushane kusuka lapho, kufone umuntu ngenombolo efihliwe, wasabisa abashayeli bami. Phakathi kwababefona, kukhona owaze wathumela umshayeli wami ukuthi ambuzele kimina ukuthi izimoto ezivalwe ukusebenza kososeshini iSiphembokuhle Taxi Assoction oseMacekana nososeshini i-Old Taxi Association, eseShowe ngizibuyisela nini emzileni.
“Kwangixaka lokho ngoba bonke abamisiwe bayawazi umthetho wokuthi uma usufuna ukubuyela emsebenzini ubhalela ikomidi incwadi,” esho.
UBiyela uchaza ngokuthi yena ungena kanjani kwabanye ososeshini.
“Kunosomatekisi engibaziyo esesisebenze isikhathi eside nabo. Ngokubona ukuthi kunozakwethu abangenawo umzila, ngabacelela ukuba babafake emzileni, manje laba engabakhulumela sebefuna ukuphatha irenki.
“Uma ngibakhuza ngithi ngeke bacelelwe ukusebenza, bona sebefuna ukuphatha umsebenzi, ngaba ngumuntu omubi,” kuchaza uBiyela ngesisusa sokushiswa kwezimoto zakhe.
Uthi ukuqala kokuhlaselwa kwezimoto kuqale ngenyanga ephelile. “Baqale ngokuhlasela izimoto zami. Bebefike bazithele ngomuthi thizeni enjinini. Lo muthi uyayidlavaza injini, imoto ife.
“Bathe uma bebona ukuthi akuzweli lokhu, baqala bazishisa. Bazishise ngokwehlukana, baqala eMandeni lapho ezimbili beziyopendwa khona, bazishisela khona.
“Badlule baya kwabanye abashayeli, nakhona bafike bazishisa, enye ize yasha nomuzi womuntu ngoba bayithungela incike endlini. Eyokugcina yibhasi, bazamile ukulishisa, bahluleka bavele bayidubula,” kuphetha uBiyela.
Okhulumela amaphoyisa KwaZuluNatal, uRobert Netshiunda, uthe amaphoyisa avule amacala okucekelwa phansi kwempahla. Bekungakaboshwa muntu. Amaphoyisa asaphenya.